Gürcüstan parlament sədri: “NATO konkret addımlar atmır, sadəcə vədlər verir”
Gürcüstan NATO-ya üzv olmaq yolunda üzərinə düşən bütün öhdəlikləri yerinə yetirsə də, Alyans tərəfindən yalnız vədlər səslənir, konkret addımlar isə hələ də atılmayıb.
Crossmedia.az xəbər verir ki, bu barədə Gürcüstan parlamentinin sədri Şalva Papuaşvili Tbilisidə yerləşən NATO Əlaqələndirmə Ofisinin son bəyanatını şərh edərkən bildirib.
Papuaşvli bəyanatın kontekstinin qeyri-müəyyən olduğunu vurğulayıb: “2008-ci ildə keçirilən Buxarest sammitində "Gürcüstan NATO-ya üzv olacaq" deyiləndə bu gün məktəbi bitirən gənc nəsil hələ dünyaya gəlməmişdi. Bu nəsil artıq məktəbi başa vurur, amma biz hələ də NATO-dan real nəticələr görmürük. Gürcüstan hər zaman etibarlı tərəfdaş olduğunu sübut edib. NATO-ya üzv ölkələrin bəziləri, xüsusilə Əfqanıstandakı missiyalardan yayındıqları halda, Gürcüstan 1000–1500 hərbçidən ibarət böyük kontingent göndərib. Halbuki Baltikyanı ölkələr cəmi 30–40 hərbçi göndərmiş və əsasən qərargahlarda təmsil olunmuşdu”.
O əlavə edib ki, NATO hələ də Gürcüstana üzvlük üçün Yol Xəritəsi təqdim etməyib. Bu isə Alyansın real qərarlar qəbul etməyə nə dərəcədə hazır olduğu ilə bağlı ciddi suallar doğurur.
Xumar Emilqızı
17:52 10.06.2025
Oxunuş sayı: 826
