Donbasda yeni mərhələ: Rusiya qüvvələri Dnipropetrovsk istiqamətində hücuma keçir
Rusiya müdafiə nazirliyi Donbasda Rusiya qüvvələrinin Donetskin qərbdəki inzibati sərhədinə çatdığını və Dnipropetrovsk vilayəti istiqamətində hücuma keçməyə hazırlaşdığını bildirib.
Crossmedia.az xəbər verir ki, nazirliyin yaydığı məlumata görə, Cənub hərbi birləşmələrinə daxil olan qüvvələr Donetsk vilayətində yerləşən Zarya yaşayış məntəqəsini tam nəzarətə götürüb. Açıqlamada “Mərkəz qoşun qrupunun 90-cı tank diviziyasına məxsus birliklər Donetsk Xalq Respublikasının qərb sərhədinə çatıb və Dnipropetrovsk ərazisində hücum əməliyyatlarını davam etdirir” ifadələri yer alıb.
Nazirlik həmçinin bildirib ki, ötən gecədən bu səhərədək, o cümlədən Moskva da daxil olmaqla müxtəlif bölgələr üzərində Ukraynaya məxsus 64 ədəd pilotsuz uçuş aparatı (PUA) məhv edilib. Açıqlamaya görə, yerli vaxtla saat 23:00-dan 07:00-a qədər 61, 09:00-dan 09:30-a qədər isə daha 3 PUA Rusiya hava hücumundan müdafiə sistemləri tərəfindən vurulub.
PUA-ların əsasən Moskva, Bryansk, Belqorod, Kalujya, Tula, Oryol, Kursk bölgələri və ilhaq edilmiş Krım üzərində düşürüldüyü qeyd olunub.
Bunun fonunda Rusiya Federal Hava Nəqliyyatı Agentliyi (Rosaviatsiya) ölkənin bir sıra hava limanlarında təyyarələrin eniş və qalxışlarına müvəqqəti məhdudiyyətlər tətbiq olunduğunu açıqlayıb.
Moskva meri Sergey Sobyanin isə bildirib ki, vurulan PUA-ların qalıqlarının düşdüyü ərazilərdə aidiyyəti qurumlar tərəfindən araşdırmalar aparılır.
Mədinə Cəlilova
22:25 08.06.2025
Oxunuş sayı: 634
