Kiyevdən məhbus mübadiləsi ilə bağlı ittiham: “Rusiya razılığı pozur”
Ukrayna Əsirlərinin Koordinasiya Mərkəzi Rusiya ilə əsir və cəsəd mübadiləsinə dair yayılan iddialara münasibət bildirib.
Crossmedia.az xarici KİV-ə istinadən xəbər verir ki, Mərkəzin yaydığı yazılı bəyanatda Rusiya administrasiyasının guya Ukraynanın həftəsonu üçün planlaşdırılan mübadiləni təxirə saldığı barədə iddialar təkzib olunub.
Bildirilib ki, son günlər hər iki tərəfdən müvafiq qruplar arasında intensiv danışıqlar aparılsa da, Rusiya razılaşdırılmış prosedurlara uyğun gəlməyən siyahılar təqdim edib:
Ukrayna tərəfi, həmçinin Rusiya prezidentinin müşaviri Vladimir Medinskinin “Ukraynanın mübadilə prosesini qeyri-müəyyən müddətə təxirə saldığı” ilə bağlı açıqlamasını əsassız adlandırıb.
Qeyd olunub ki, tərəflər arasında cəsədlərin qaytarılması ilə bağlı ümumi razılıq mövcuddur, lakin konkret tarixlə bağlı razılaşma hələ əldə olunmayıb.
Bəyanatda vurğulanıb ki, Moskvanın birtərəfli addımları və humanitar məsələlər üzərindən manipulyativ yanaşması real nəticələrin əldə olunmasına maneə yaradır. Kiyev Rusiya tərəfini razılaşdırılmış prosesə qayıtmağa çağırıb.
Xatırladaq ki, iyunun 2-də İstanbulda Ukrayna və Rusiya nümayəndə heyətlərinin iştirakı ilə danışıqların ikinci raundu keçirilib.
Görüş zamanı tərəflər əsir mübadiləsinin davam etdirilməsi və 12 min hərbçinin cəsədinin qarşılıqlı qaytarılması ilə bağlı ilkin razılığa gəliblər. Razılaşmaya ən gənc və ağır yaralı əsirlərin də daxil olduğu bildirilir.
Aybəniz Səfərova
19:37 07.06.2025
Oxunuş sayı: 715
