Türkiyənin müdafiə sənayesi dünya bazarlarında mövqeyini gücləndirir
Türkiyənin müdafiə sənayesi şirkətləri son illərdə Asiya və Afrikadan sonra NATO və Avropa İttifaqı ölkələrinə də yönələrək qlobal miqyasda strateji satınalmalar həyata keçirməkdə davam edir.
Crossmedia.az xəbər verir ki, bu barədə “Türkiye” qəzeti məlumat yayıb.
Məlumata görə, Türkiyənin aparıcı aerokosmik şirkəti "TUSAŞ" 2016-cı ildə Almaniyanın "Grunwald" şirkətini satın alaraq beynəlxalq bazarlara çıxış və texnoloji inkişaf baxımından mühüm bir addım atıb.
Türkiyənin yerli zirehli polad istehsalını hədəfləyən "OYAK" isə 2019-cu ildə Finlandiyanın "Miilux" şirkətinin nəzarət səhm paketini əldə edib.
"OYAK" eyni zamanda Finlandiya və Polşadakı zavodlardan əlavə, Türkiyənin Manisa şəhərində ilk və yeganə istiliklə işlənmiş düz polad istehsal zavodunu da qurub.
İki il əvvəl Türkiyənin ballistik mühafizə sahəsində ixtisaslaşmış Nurol Teknoloji şirkəti Almaniyanın keramika xammalı istehsalçısı "Industrie Keramik Hochrhein" (IKH) şirkətinə nəzarəti ələ alıb. Bununla yanaşı, dünyada atıcı silahlar sahəsində aparıcı istehsalçılardan olan "CANİK" Böyük Britaniyanın ən qədim müdafiə sənayesi şirkətlərindən biri sayılan "AEI Systems"i satın alıb.
2024-cü ildə isə pilotsuz uçuş aparatları və kosmos texnologiyalarında strateji hədəflərini genişləndirən "BAYKAR", İtaliyanın "Piaggio Aerospace" şirkətini satın alaraq Avropa ölkələrinin diqqətini cəlb edib və narahatlıq doğuran razılaşmaya imza atıb.
Ən son satınalma isə 2025-ci ilin may ayının sonunda baş tutub. "ASSAN Group" Cənubi Afrikanın "DynaFlow Technologies" şirkətini əldə edib.
Hazırda Türkiyənin müdafiə sənayesi sektoru 3 500-dən çox şirkət, 1 100-dən artıq aktiv layihə ilə dünyanın aparıcı sənaye sahələrindən birinə çevrilib. Sektorun məhsulları 180-dən çox ölkəyə ixrac olunur və ixrac çeşidi 300-dən artıqdır.
18:42 07.06.2025
Oxunuş sayı: 523
