Türkiyə və İsrail arasında Suriya gərginliyi azalmağa doğru gedir - Bakı da prosesə töhfə verib
Suriyada Türkiyə ilə İsrail arasında mövcud olan gərginliyin azalma ehtimalları görünməyə başlayıb.
Crossmedia.az xarici mediaya istinadən bildirir ki, Türkiyə hələlik Suriyada, İsrailə yaxın sərhəd bölgələrində hərbi bazalar açmaqdan imtina edib. Bunun müqabilində İsrail razılıq verib ki, Suriya ordusu sərhəddə – o cümlədən Colan Təpələri istiqamətində – bufer zonada yerləşdirilsin.
Məlumatda qeyd olunur ki, bu prosesin formalaşmasında Azərbaycanın diplomatik vasitəçiliyi və fəaliyyəti də əhəmiyyətli rol oynayıb. Bakı tərəfi tərəflər arasında əlaqələrin yumşalması və qarşılıqlı anlaşmanın əldə olunması üçün bir sıra diplomatik təşəbbüslərlə çıxış edib.
Ekspertlərin fikrincə, Azərbaycanın bu kimi həssas geosiyasi məsələlərdə diplomatik fəallığı regionda artan nüfuzunun göstəricisidir. Qeyd olunur ki, Bakı həm Ankara, həm də Təl-Əvivlə münasibətləri balanslı şəkildə qoruyaraq, vasitəçilik rolunda çıxış edə bilən azsaylı ölkələrdən biridir. Bu isə Azərbaycanın beynəlxalq diplomatik səhnədə mövqeyini daha da gücləndirir.
Fatimə Nəbiyeva
16:17 07.06.2025
Oxunuş sayı: 1244
