Sərkisyanın yeni “baş naziri” var – Ermənistan müxalifəti Aşotyanı irəli sürür
Ermənistanın keçmiş prezidenti Serj Sərkisyanın lideri olduğu Respublikaçılar Partiyası ölkənin baş nazir postuna öz namizədini müəyyənləşdirib.
Crossmedia.az xarici mediaya istinadən bildirir ki, Ermənistan parlamentində hazırkı baş nazir Nikol Paşinyanın impiçmenti ilə bağlı müxalifətin başladığı proses fonunda Respublikaçılar Partiyası (RPA) bu vəzifəyə keçmiş deputat və partiyanın tanınmış siması Armen Aşotyanın namizədliyini irəli sürmək niyyətindədir.
Məlumata görə, Aşotyanın namizədliyinin yaxın günlərdə rəsmi şəkildə elan olunacağı gözlənilir. Bildirilir ki, əvvəllər RPA bu posta Milli Təhlükəsizlik Xidmətinin keçmiş rəhbəri Artur Vanetsyanı dəstəkləyirdi, lakin müəyyən səbəblərdən bu qərar dəyişdirilib.
Armen Aşotyan Ermənistan siyasətində kifayət qədər tanınan fiqurdur. O, uzun illər parlamentdə təmsil olunub, həmçinin təhsil naziri vəzifəsində də çalışıb. Aşotyan Sərkisyan dövründə iqtidarın əsas ideoloqlarından biri kimi çıxış edirdi.
Qeyd edək ki, Respublikaçılar Partiyasının lideri Serj Sərkisyan Ermənistanın keçmiş müdafiə və milli təhlükəsizlik naziri olmaqla yanaşı, prezident və baş nazir vəzifələrini də icra etmiş siyasətçidir.
Ekspertlər bu namizədliyin irəli sürülməsini müxalifətin siyasi fəallığını artırmaq cəhdi kimi dəyərləndirirlər. Bu addım Paşinyan hökumətinə qarşı mübarizədə yeni mərhələnin başlaya biləcəyindən xəbər verir.
Fatimə Nəbiyeva
14:55 07.06.2025
Oxunuş sayı: 712
