Mask-Tramp gərginliyi kosmosa daşındı: SpaceX-dən NASA-ya təhdid
Dünyanın ən varlı insanı İlon Mask ABŞ prezidenti Donald Tramp ilə yaşadığı gərginliyin ardından, Beynəlxalq Kosmik Stansiyaya (ISS) insan və avadanlıq daşıyan Dragon kapsulunu xidmətdən çıxara biləcəyini bəyan edib.
Crossmedia.az ABŞ mətbuatına istinadən xəbər verir ki, bu təhdid Trampın SpaceX və Starlink-ə verilən dövlət müqavilələrini ləğv etmək yönündəki açıqlamalarına cavab olaraq səsləndirilib.
Dragon kapsulu hazırda NASA-nın ISS-yə insan və yük daşımaq üçün istifadə etdiyi yeganə Amerika mənşəli vasitədir. Alternativ olaraq hazırlanan Boeing-in Starliner kapsulu isə uğursuz sınaq uçuşları səbəbilə etibarsız sayılır və hazırda istifadəyə verilməyib.
Əgər Dragon xidmətdən çıxarılarsa, NASA-nın yeganə seçimi Rusiya istehsalı Soyuz kapsulları olacaq. Bu kapsulların məhdud tutumu var və ABŞ-yə hər bir oturacaq üçün milyonlarla dollara başa gəldiyi bilinir.
Mask və Tramp arasındakı bu qarşıdurma yalnız kosmos proqramlarını deyil, həm də Tesla şirkətinin bazar dəyərini mənfi təsirləmişdir. Trampın Maska qarşı yönəltdiyi tənqidlər və dövlət dəstəyini kəsmə təhdidlərindən sonra Tesla səhmləri təxminən 14% dəyər itirib və bu, 150 milyard dollarlıq bazar itkisinə səbəb olub.
Baş verənlər ABŞ-nin kosmosdakı müstəqilliyi və özəl sektorla olan əməkdaşlığını yenidən nəzərdən keçirməsinin vacibliyini gündəmə gətirir. Eyni zamanda, siyasi münaqişələrin texnologiya və elm sahəsindəki strateji layihələrə necə təsir edə biləcəyinə dair əhəmiyyətli bir nümunədir.
Mədinə Cəlilova
22:15 06.06.2025
Oxunuş sayı: 1159
