Tramp və Mask arasında gərginlik: Dövlət dəstəyi dayandırıla bilər
ABŞ Prezidenti Donald Tramp ilə Tesla və SpaceX şirkətlərinin rəhbəri İlon Mask arasında münasibətlər iyunun 5-də kəskin şəkildə gərginləşib. Münaqişə sosial şəbəkələrdə açıq qarşılıqlı ittihamlarla müşayiət olunub. Tramp, Maskın şirkətlərinin dövlət subsidiyalarından məhrum edilə biləcəyini bəyan edib.
Crossmedia.az xəbər verir ki, Bu barədə CNN məlumat verib.
Açıq qarşıdurma Trampın Ağ Evdə keçirdiyi mətbuat konfransından sonra başlayıb. Prezident çıxışında Maskı Respublikaçıların vergi güzəştlərinin uzadılması və yeni büdcənin formalaşdırılması ilə bağlı qanun layihəsinə qarşı çıxış etdiyinə görə sərt şəkildə tənqid edib.
“Mən istərdim ki, o, məni tənqid etsin, qanun layihəsini yox. Çünki bu qanun layihəsi sadəcə heyrətamizdir,” – deyə Tramp bildirib. Onun sözlərinə görə, Mask sənəddən elektromobil sənayesinə aid stimulların çıxarılmasına görə qəzəblidir və bu, onun milyardlarla dollar itirməsi ilə nəticələnə bilər. Tramp əlavə edib ki, Mask layihənin detallarını əvvəldən bilib.
Mask isə “X” (əvvəlki Twitter) platformasında yayımladığı bəyanatda bu iddiaları “yalan” adlandırıb və bildirib ki, qanun layihəsinin detallarından xəbərsiz olub. O, əlavə edib ki, Tramp onun dəstəyi olmadan seçkilərdə qalib gələ, Respublikaçılar isə Nümayəndələr Palatasında üstünlük qazana bilməzdilər.
“Belə nankorluq qəbuledilməzdir,” – deyə Mask yazıb.
Cavab olaraq Tramp Truth Social platformasında Maskın şirkətlərinə verilən dövlət dəstəyinin ləğv oluna biləcəyini açıqlayıb:
“Büdcədən milyardlarla dollar qənaət etməyin ən asan yolu – İlon Maskın dövlət subsidiyalarını və kontraktlarını dayandırmaqdır. Mən həmişə təəccüblənirdim ki, Bayden niyə bunu etməyib!” – deyə Tramp bildirib.
Tramp həmçinin əlavə edib ki, Mask onun xahişi ilə hökumətdən ayrıldıqdan sonra “ağlını itirib”.
İlon Mask isə cavabında Trampı maliyyəçi Ceffri Epşteynin “faylları” ilə bağlı qalmaqala görə ittiham edib. O, Trampın bu sənədlərin gizli saxlanmasında əli olduğunu bildirib:
“Bu, sənədlərin niyə hələ də açıqlanmadığının əsl səbəbidir,” – deyə Mask yazıb. Lakin o, bu iddiasını təsdiqləyəcək heç bir sübut təqdim etməyib.
Bu açıqlamalardan sonra Mask bildirib ki, Trampın dövlət kontraktlarını ləğv edəcəyinə dair bəyanatı fonunda SpaceX şirkəti Dragon kosmik gəmisinin istismardan çıxarılmasına dərhal başlayacaq. Qeyd edək ki, bu gəmi hazırda ABŞ-ın Beynəlxalq Kosmik Stansiyaya astronavt daşıya bilən yeganə kosmik vasitəsidir və rus “Soyuz” gəmisinə alternativdir.
Mask həmçinin Trampın impiçmentini tələb edib və onun yerinə vitse-prezident Cey Di Vənsin təyin olunmasını təklif edib.
Gərginliyin təsiri bazara da yansıyıb: Tesla şirkətinin səhmləri cəmi üç saat ərzində 15%-dən çox dəyər itirib.
Nigar Rəhimova
16:15 06.06.2025
Oxunuş sayı: 1082
