İsrail ordusunun Qəzzaya endirdiyi zərbələr nəticəsində dörd jurnalist və onlarla fələstinli həyatını itirib
İsrail ordusunun Qəzza zolağına endirdiyi son hava və artilleriya hücumları nəticəsində azı 40 fələstinli həyatını itirib. Həlak olanlar arasında dörd jurnalist və bir neçə uşaq da var.
Crossmedia.az-ın xarici KİV-ə istinadla verdiyi xəbərə görə, ən ağır zərbələrdən biri Deyr əl-Bələh şəhərində, yaşayış evinin bombalanması nəticəsində qeydə alınıb. Hücumda bir qız uşağı ölüb, bir neçə sakin yaralanıb.
Nusayrat Qaçqınlar Düşərgəsinin şimalındakı Magraka qəsəbəsi, Xan Yunisin Asda bölgəsindəki köçkün çadırları və Roni küçəsindəki yaşayış yerləri artilleriya və PUA hücumlarının hədəfi olub. Nəticədə azı 11 nəfər həyatını itirib.
Xan Yunisin şərqində və Karara qəsəbəsində binalar partladılıb, müxtəlif ərazilər – o cümlədən Batn əs-Samin, Kizan ən-Nəccar, əl-Balad və Ketibe – artilleriya atəşinə məruz qalıb.
Qəzza şəhərinin cənubundakı Kaşqou küçəsində endirilən zərbədə üç nəfər, o cümlədən iki uşaq həlak olub. Humanitar yardım maşınına hücumda iki nəfər, Beni Süheylada isə dörd fələstinli öldürülüb.
Cibaliyədə hamilə qadın da daxil olmaqla iki nəfər həyatını itirib, dağıntılar altından daha üç cəsəd çıxarılıb. Əl-Əhli Baptist Xəstəxanasının həyətinə edilən hava zərbəsi nəticəsində dörd jurnalist ölüb.
Beyt Lahiyyədə artilleriya hücumu üç nəfərin, Əş-Şifa küçəsindəki PUA zərbəsi isə dörd nəfərin ölümünə səbəb olub.
22:19 05.06.2025
Oxunuş sayı: 1000
