Xarici xəbərlər
Misir XİN: “Qəzzada müharibəyə son qoymaq üçün əlimizdən gələni edirik”
Misirin xarici işlər naziri Bədr Abdelatti ölkəsinin Qəzza zolağında hərbi əməliyyatların dayandırılması və humanitar fəlakətin qarşısının alınması məqsədilə intensiv diplomatik səylər göstərdiyini bildirib.
Crossmedia.az xəbər verir ki, nazir müharibəyə son qoymaq və bölgədə qan tökülməsini dayandırmaq üçün Misirin bütün imkanlarını səfərbər etdiyini vurğulayıb:
“Qəzzada müharibənin bitməsi və razılaşmanın əldə olunması üçün tam gücümüzlə çalışırıq. Ümid edirik ki, ən qısa zamanda qan tökülməsinə son qoyulacaq”, – deyə Abdelatti qeyd edib.
Nazir, həmçinin İsrailin Qəzzada aclığı silah kimi istifadə etməsini kəskin şəkildə pisləyib. O bildirib ki, mülki əhalinin aclıqla cəzalandırılması beynəlxalq humanitar hüququn kobud şəkildə pozulmasıdır.
Xatırladaq ki, İsrail martın 2-dən etibarən Qəzzaya giriş-çıxışı təmin edən bütün sərhəd məntəqələrini bağlayıb. Nəticədə bölgədə yaşayan 2,4 milyon insan qida, dərman, yanacaq və digər həyati zəruri ehtiyaclardan məhrum qalıb.
Qeyd edək ki, Misir son aylarda HƏMAS və İsrail arasında vasitəçi rolunu oynayır və atəşkəs razılaşmasının əldə olunması üçün beynəlxalq tərəfdaşlarla koordinasiyada danışıqları davam etdirir.
20:39 02.06.2025
Oxunuş sayı: 1160
