HƏMAS ABŞ-nin atəşkəs təşəbbüsünə şərti razılıq verir
Fələstinin HƏMAS hərəkatı ABŞ-nin Yaxın Şərq üzrə xüsusi elçisi Stiv Vitkoffun Qəzza zolağında atəşkəslə bağlı irəli sürdüyü yeni təşəbbüsə ilkin olaraq müsbət yanaşır. Lakin radikal qruplar bu təklifi yalnız müəyyən şərtlərlə qəbul etməyi planlaşdırır.
Crossmedia.az xəbər verir ki, bu barədə “Əl-Ərəbiyyə” telekanalı HƏMAS-dakı mənbələrə istinadla məlumat yayıb.
Mənbələrin bildirdiyinə görə, HƏMAS təklifdəki girov mübadiləsi müddəti ilə razı deyil. Hərəkat Qəzzada saxlanılan israilli girovların iki gün ərzində deyil, mərhələli şəkildə – 60 gün ərzində azad olunmasını tələb edir.
Eyni zamanda, HƏMAS ABŞ-dən İsrailin mümkün razılaşmaya tam riayət edəcəyinə dair real zəmanət verməsini istəyir.
HƏMAS nümayəndələri hesab edir ki, Vitkoffun təqdim etdiyi cari plan İsrailə Qəzzada hərbi əməliyyatları bərpa etmək üçün imkanlar saxlayır.
Bundan başqa, qrup təklifdə İsrail qoşunlarının Qəzza zolağından çıxarılması ilə bağlı konkret mexanizm və dəqiq cədvəlin göstərilməməsini də əsas çatışmazlıq kimi qiymətləndirir.
Digər tərəfdən, “Əl-Hədəs” telekanalının məlumatına görə, şənbə günü HƏMAS bir neçə Fələstin fraksiyasının rəhbərləri ilə məsləhətləşmələr aparıb.
Radikal qruplar Vitkoffun təklifini idealdan uzaq saymalarına baxmayaraq, onu atəşkəsin əldə olunması üçün mövcud şəraitdə real fürsət kimi qiymətləndirərək HƏMAS-a bu istiqamətdə addım atmağı tövsiyə ediblər.
Aybəniz Səfərova
19:26 31.05.2025
Oxunuş sayı: 1377
