ABŞ-Çin münasibətlərində yeni gərginlik: Tramp razılaşmanı etibarsız sayır
ABŞ prezidenti Donald Tramp Çin hökumətini Vaşinqtonla imzalanmış ticarət razılaşmasını pozmaqda ittiham edib.
Crossmedia.az xəbər verir ki, Tramp bu barədə "Truth Social" platformasında paylaşım edərək bildirib ki, Çinlə əldə olunmuş razılaşmanın şərtlərinə əməl olunmayıb.
Onun sözlərinə görə, tətbiq etdiyi yüksək tariflər Çinin ABŞ bazarına çıxışını demək olar ki, mümkünsüz edib:
“Çinə qarşı tətbiq etdiyimiz tariflər onların ticarət imkanlarını ciddi şəkildə məhdudlaşdırdı. Bu, bir çox fabrikin bağlanmasına və daxili narazılıqlara səbəb oldu”.
ABŞ prezidenti bildirib ki, vəziyyətin daha da pisləşməməsi üçün Çinlə sürətli şəkildə razılıq əldə olunub və bu, müəyyən sabitlik yaradıb:
“Çinlə onların vəziyyətini daha da ağırlaşdıracaq bir ssenaridən çıxmaq üçün razılaşdıq. Nəticədə hər şey tezliklə sabitləşdi, vəziyyət normallaşdı. Amma təəssüf ki, Çin bu razılaşmanı pozdu”.
Xatırladaq ki, ABŞ-nin tətbiq etdiyi yeni tariflərə əsasən, Çin mallarına gömrük rüsumları 145 faizə qaldırılmışdı. Cavab olaraq Çin də ABŞ məhsullarına 125 faizlik tarif tətbiq etmişdi.
Bu ay İsveçrədə keçirilən danışıqlardan sonra tərəflər müvəqqəti olaraq gömrük tariflərinin aşağı salınmasına dair razılığa gəliblər.
Razılaşmaya əsasən, 14 maydan etibarən 90 gün müddətində ABŞ Çin məhsullarına tətbiq olunan tarifləri 145 faizdən 30 faizə, Çin isə ABŞ mallarına qoyulan tarifləri 125 faizdən 10 faizə endirəcək.
Qeyd edək ki, tərəflər arasında ticarət-iqtisadi əlaqələrin davamlı şəkildə müzakirəsi üçün yeni mexanizmin yaradılması planlaşdırılır.
19:58 30.05.2025
Oxunuş sayı: 11805
