Zelenski: “Sülh danışıqları üçün ən real üç məkan – Türkiyə, İsveçrə və Vatikandır”
Ukrayna Prezidenti Volodimir Zelenski Rusiya ilə mümkün sülh danışıqları və bölgədəki son vəziyyətlə bağlı açıqlamalar verib. O bildirib ki, Rusiya danışıqların Belarusda keçirilməsini təklif etsə də, bu Ukrayna üçün qəbuledilməzdir.
Crossmedia.az xarici mediaya istinadən xəbər verir ki, Zelenski sülh danışıqlarına ev sahibliyi etmək üçün ən real məkanların Türkiyə, İsveçrə və Vatikan olduğunu vurğulayıb. Onun sözlərinə görə, Malta və bir sıra Afrika ölkələri də danışıqlara ev sahibliyi etmək istədiklərini bildiriblər. Növbəti G7 zirvəsində iştirak edəcəyini, Avropa İttifaqı (Aİ) sammitində də “mümkün bir formada” yer alacağını qeyd edib.
Zelenski həmçinin Rusiya ordusunun Ukraynanın Sumi bölgəsinə hücum üçün 50 minlik hərbi qüvvə topladığını iddia edib. O, Ukraynanın müdafiə sənayesinin tam şəkildə maliyyələşdirilməsi üçün 30 milyard dollar vəsaitə ehtiyacı olduğunu bəyan edib.
Digər tərəfdən, Rusiya Müdafiə naziri Andrey Belusov da yeni açıqlama verib. O bildirib ki, NATO Ukrayna böhranından istifadə edərək Şərqi Avropa, Mərkəzi Avropa və Baltikyanı ölkələrdə hərbi mövcudiyyətini gücləndirir.
Belusov, Qərbin Rusiyaya strateji məğlubiyyət yaşatmaq cəhdlərini davam etdirdiyini, Rusiya ordusunun isə Ukraynada cəbhənin demək olar ki, bütün istiqamətlərində irəliləyiş əldə etdiyini bildirib. Nazir əlavə edib ki, Kiyev Rusiya tərəfinin münaqişəni həll etməyə hazır olduğunu görməzlikdən gəlir.
Mədinə Cəlilova
22:30 28.05.2025
Oxunuş sayı: 1511
