Xarici xəbərlər
Qəzzada yardım xaosu: ABŞ nəzarəti itirib, BMT-yə çağırış edilir
Qəzzada humanitar yardım paylanması zamanı yaşanan insidentdə İsrail ordusunun izdihama atəş açması ciddi narazılıqla qarşılanıb.
Crossmedia.az xəbər verir ki, ABŞ və İsrailin dəstəyi ilə yaradılan Qəzza Humanitar Fondu (GHF) tərəfindən Rəfah şəhərində qurulan ilk yardım paylama məntəqəsində yardım almağa gələn minlərlə fələstinli qarşısında İsrail əsgərləri xəbərdarlıq atəşi açıb. Hadisə nəticəsində yaralananlar olub.
Yardım alan fələstinli Əhməd Əbu Müslim deyib: “Yardım almaq çox çətin idi. Tanklar üstümüzə atəş açdı və bir neçə nəfər yaralandı. Çox çətinliklə yardım paketini ala bildim və tez geri qayıtdım”.
Birləşmiş Millətlər Təşkilatı isə hadisəni sərt tənqid edərək, yardım nöqtəsində lentə alınan görüntüləri “ürək parçalayan” adlandırıb.
Qurumdan bildirilib: “Bizim və tərəfdaşlarımızın təfərrüatlı, prinsipial və əməliyyat baxımından əsaslı planı var. Humanitar yardımın artırılması aclığın qarşısını almaq üçün həyati əhəmiyyət daşıyır”.
Qeyd edək ki, BMT və digər yardım təşkilatları daha əvvəl GHF-nin yardım modelini humanitar prinsiplərə zidd hesab etmiş, bu sistemin insanları evlərindən uzaqlaşdıraraq riskləri artıracağını vurğulamışdı.
Aybəniz Səfərova
00:55 28.05.2025
Oxunuş sayı: 1186
