Fransa Ermənistanla əməkdaşlığı genişləndirməyə hazırdır
Fransanın xarici işlər naziri Jan-Noel Barro Ermənistanın paytaxtı İrəvanda keçirdiyi mətbuat konfransında Fransa prezidenti Emmanuel Makronun istəyi ilə ölkəsinin Ermənistana stabil, hərtərəfli və sarsılmaz dəstək verməkdə qətiyyətli olduğunu vurğulayıb.
Crossmedia.az xəbər verir ki, nazir ilk növbədə, çətin danışıqlardan sonra əldə olunmuş Sülh sazişini dəstəklədiyini və bu kontekstdə baş nazir Nikol Paşinyanın qətiyyətini alqışladığını bildirib. Barro həmkarı Marko Rubionun sözlərini xatırladaraq bu sazişi imzalamağın və ratifikasiya etməyin vaxtının çatdığını, bunu isə Fransa, ABŞ və Avropanın gözlədiyini bildirib.
Bununla yanaşı, Fransa və Ermənistan faktiki mövcud olan strateji əlaqələri daha da gücləndirmək və sənədləşdirmək niyyətindədir. Nazir Barro onu da bildirib ki, bu məqsədlə Ermənistan xarici işlər naziri Ararat Mirzoyanla birlikdə strateji tərəfdaşlıq layihəsi hazırlanacaq. Gözlənilir ki, bu tərəfdaşlıq gələcək onillikləri əhatə edəcək yeni proqram və layihələri, o cümlədən müdafiə sahəsində əməkdaşlığı da nəzərdə tutur.
Nigar Yahyazadə
19:34 26.05.2025
Oxunuş sayı: 10949
