Papa XIV Leo-nun Respublikaçılar Partiyasına bağlılığına dair iddialar sübutsuzdur
ABŞ-da doğulan ilk papa Robert Prevostun – yəni hazırkı Papa XIV Leo-nun – siyasi mənsubiyyəti ilə bağlı iddialar son zamanlar sosial mediada geniş müzakirə olunur. Lakin onun “qeydiyyatdan keçmiş Respublikaçı” olduğuna dair hər hansı rəsmi və sübutlu məlumat mövcud deyil.
Bəzi fəallar, xüsusilə Tramp tərəfdarı Çarli Kirk, Papa Leonun ABŞ-da Respublikaçılar Partiyasının praymerizində səs verdiyini iddia ediblər. O, mayın 8-də bu barədə X platformasında paylaşım edərək, Papa Leonun respublikaçı kimi qeydiyyatdan keçdiyini və “həyat tərəfdarı” olduğunu bildirib.
Crossmedia.az xarici mediaya istinadən bildirir ki, sosial mediada yayılan və Robert Prevostun adını, doğum tarixini göstərən seçici kartı skrinşotu saxta ola bilər. Çünki İllinoys ştatı seçiciləri partiya mənsubiyyətinə əsasən qeydiyyatdan keçirmir. Bu da o deməkdir ki, həmin “Respublikaçı” qeydli kart rəsmi sənəd ola bilməz.
Buna baxmayaraq, İllinoys vilayət dairəsinin paylaşdığı səsvermə məlumatlarına görə, Prevost 2012, 2014 və 2016-cı illərdə Respublikaçı praymerizində iştirak edib. Lakin bu, onun həmin partiyaya bağlı olduğunu sübut etmir. Çünki ştat sakinləri hər praymeridə fərqli partiyanı seçə bilirlər.
Əlavə olaraq, Prevostun ümumi seçkilərdəki partiya mənsubiyyəti “naməlum” olaraq qeyd edilib. Reuters yazır ki, o, 2008 və 2010-cu illərdə Demokratların praymerilərində də iştirak edib. Lakin bu məlumatlar hələ tam təsdiqlənməyib.
Papa seçilməzdən əvvəlki fəaliyyətində Prevost, ABŞ siyasətinə dair bəzi tənqidi mövqeləri ilə seçilirdi. O, senator J.D. Vance-in müsahibəsinə cavab olaraq “İsa bizdən başqalarına olan məhəbbətimizi azaltmağı tələb etmir” fikrini paylaşmışdı. Həmçinin Trampın sərt immiqrasiya siyasətini, o cümlədən bir şəxsin El Salvadora deportasiyasını açıq şəkildə tənqid etmişdi.
Zəhra Ağayeva
18:33 26.05.2025
Oxunuş sayı: 1509
