Səmərqənd Universitetindən Bakıya mesaj: “Azərbaycanlı gənclər üçün ikinci evik!”
"İngla School Baku" təşkilatçılığında Bakı şəhərində keçirilən beynəlxalq təhsil sərgisi çərçivəsində Səmərqənd Dövlət Xarici Dillər İnstitutunun nümayəndələri də iştirak edib. Sərgi zamanı institutun dosenti və müəllim heyətinin üzvü Kaxramon Hakimov, tədbirin yalnız təhsil əməkdaşlığı üçün deyil, həm də Azərbaycan və Özbəkistan arasında tarixi-mədəni bağların yenidən qurulması baxımından böyük əhəmiyyət daşıdığını bildirib.
Onun sözlərinə görə, Azərbaycan və Özbəkistan xalqları qədimdən bəri qardaş münasibətləri ilə seçilib. Tarixdə bu xalqlar bir çox hallarda ortaq düşmənə qarşı çiyin-çiyinə mübarizə aparıb. O, sərgini bu ortaq tarix və mədəniyyəti gənc nəslə tanıtmaq üçün mühüm fürsət kimi dəyərləndirib. “Əgər bu məlumatları gənclərə düzgün şəkildə ötürə bilsək, gələcək üçün əvəzolunmaz bir körpü qurmuş olarıq”, – deyə o bildirib.
Hakimov, azərbaycanlı gənclərin bu şəhərdə təhsil alaraq özlərini evdəki kimi hiss edə biləcəklərini vurğulayıb. Onun fikrincə, institutun peşəkar professor-müəllim heyəti, Səmərqəndin günəşli havası, dadlı meyvələri və yeməkləri azərbaycanlı tələbələrin adaptasiyasını asanlaşdıracaq. O qeyd edib ki, institut yalnız akademik sahədə deyil, mədəni irs sahəsində də fəxr ediləcək ənənələrə sahibdir.
Özbəkistan və Azərbaycanın mədəni əlaqələrinin tarixinə toxunan dosent, musiqi sahəsindəki qarşılıqlı təsirləri xüsusi qeyd edib. O, azərbaycanlılarla ailə quran və Azərbaycan musiqisinin Özbəkistanda tanınmasında rol oynayan müğənni Nəsibə Abdullayevanı nümunə göstərib. Bu gün də həm özbək, həm də azərbaycan musiqiləri qarşı tərəfin toy və tədbirlərində geniş şəkildə səslənməkdədir. Məsələn, Ulug‘bek Rahmatullaevin “Qizil olma” mahnısı Azərbaycanda kifayət qədər populyarlıq qazanıb.
Nümayəndə, bu yaxınlaşmanın son 70–100 ildə müəyyən qədər unudulduğunu, lakin yeni təhsil əməkdaşlıqları vasitəsilə bu bağların yenidən bərpa oluna biləcəyini deyib. Onun fikrincə, gənclərin qarşılıqlı olaraq Səmərqənd və Bakıdakı universitetlərdə təhsil almaları bu prosesi daha da sürətləndirəcək.
Sərgi çərçivəsində nümayəndə heyəti Bakı Dövlət Universitetini və Azərbaycan Dillər Universitetini ziyarət edib. Onlar bu ali təhsil müəssisələri ilə, xüsusilə də dil və humanitar elmlər üzrə əməkdaşlıqda maraqlı olduqlarını açıqlayıblar. Vurğulanıb ki, əsas məqsəd yalnız sənəd üzərində rəsmi sazişlər imzalamaq deyil, real nəticələrə gətirib çıxaracaq praktik əməkdaşlıq qurmaqdır.
Səmərqənd Dövlət Xarici Dillər İnstitutu bu əməkdaşlığı Azərbaycanlı tələbələr üçün yeni imkanlar və mədəni yaxınlaşma platforması kimi dəyərləndirir. “Biz istəyirik ki, azərbaycanlı tələbələr Səmərqənddə təhsil alaraq öz mədəniyyətlərinə nə qədər yaxın bir coğrafiyada olduqlarını hiss etsinlər”, – deyə institutun nümayəndəsi bildirib.
Qeyd edək ki, mayın 3-də İngla School Baku-nun təşkilatçılığı ilə AMEA Mərkəzi Elmi Kitabxanasında Özbəkistan universitetlərinin sərgisi keçirilib. Tədbirin tərəfdaşları Özbəkistan Ali Təhsil Nazirliyi, Özbəkistanın Azərbaycandakı Səfirliyi, AMEA Mərkəzi Elmi Kitabxanası (MEK), Crossmedi.az Analitik informasiya Portalı idi.
Qardaş Özbəkistanın 15-ə qədər nüfuzlu universitetlərindən – STARS Beynəlxalq Universiteti, Jurnalistika və Kütləvi kommunikasiya Universiteti, Milli Tədqiqatlar Universiteti “Daşkənd İrreqasiya və Aqrotexnika Avtomatlaşdırma İnstitutu”, Özbəkistan-Finlandiya Pedaqogika Universiteti, Səmərqənd Dövlət Xarici Dillər Universiteti, Buxara Dövlət Universiteti, Əbu Əli İbni Sina adına Buxara Dövlət Tibb İnstitutu, İslam Kərimov adına Daşkənd Dövlət Texniki Universiteti, Daşkənd Tibb Akademiyası, Vebster Universiteti (Daşkənd), Turin Politexnik Universiteti Daşkənd Filialı, Kokand Pedaqoji Universiteti, Daşkənd Əczaçılıq Universiteti, Daşkənd Dövlət İqtisadiyyat Universiteti olmaqla 40-dan çox nümayəndə sərgiyə qatılıb.
Emil Nağızadə
17:50 03.05.2025
Oxunuş sayı: 12798
