Tanınmış hərbi ekspert Ramiz Mehdiyevdən danışdı: Əgər sən...
Prezident İlham Əliyevin imzaladığı Fərmanla Ramiz Mehdiyev Azərbaycan Respublikası Təhlükəsizlik Şurasının üzvlüyündən azad edilib. Uzun illər Prezident Administrasiyasına rəhbərlik etmiş və AMEA-nın prezidenti olmuş Mehdiyev hazırda dövlətə xəyanət, hakimiyyəti ələ keçirməyə cəhd və cinayət yolu ilə əldə edilmiş əmlakı leqallaşdırma ittihamları ilə üzləşib. Səbail Rayon Məhkəməsi onun barəsində 4 ay müddətinə ev dustaqlığı qətimkan tədbiri seçib. Bu hadisə ölkənin siyasi və hüquqi mühitində ciddi rezonans doğurub.
Mövzu barədə hərbi ekspert Üzeyir Cəfərov Crossmedia.az-a bildirib ki, Təhlükəsizlik Şurasının üzvləri dövlətin bütün strateji və məxfi məlumatlarına malik olurlar:
“Təhlükəsizlik Şurasının üzvləri dövlət əhəmiyyətli hərbi və strateji məsələlərlə bağlı bütün sirlərə çıxış imkanına malikdirlər. Çünki ölkənin mühüm qərarları məhz bu qurumda müzakirə olunur və qəbul edilir. O nöqteyi-nəzərdən, əgər sən Təhlükəsizlik Şurasının üzvü deyilsənsə, həmin iclaslarda iştirak edə bilməzsən — kim olursansa ol, hansı vəzifəni tutursansa tut. Bu baxımdan Ramiz Mehdiyevin oradan çıxarılması o deməkdir ki, onun artıq dövlətin mühüm məsələləri ilə bağlı məxfi məlumatlara çıxışı olmayacaq".
Ekspert əlavə edib ki, Təhlükəsizlik Şurasında Prezident, Baş nazir güc strukturlarının rəhbərləri və bir neçə əsas dövlət qurumunun nümayəndələri təmsil olunur: “Əgər sən üzvlükdən çıxarılırsansa, bu, artıq o deməkdir ki, sən həmin iclaslarda müzakirə olunan məsələlərdə iştirak edə və fikir bildirə bilməzsən. Ramiz Mehdiyev uzun illər Prezident Administrasiyasının rəhbəri olub, sonra Elmlər Akademiyasına başçılıq edib — bunlar strateji əhəmiyyətli postlardır. Lakin indi üzvlükdən azad olunması göstərir ki, artıq onunla bağlı hüquqi prosedurlar mərhələsinə keçilib".
Mehriban Yariyeva
15:29 20.10.2025
Oxunuş sayı: 7544
