“Mən öləndə, ağlama” — səssiz fəryadın səhnədə hayqırışı
Aprelin 18-də Azərbaycan Dövlət Milli Gənc Tamaşaçılar Teatrının böyük səhnəsində postmodern ruhda təqdim olunan, monotamaşa janrında səhnələşdirilmiş “Mən öləndə, ağlama” tamaşası növbəti dəfə teatrsevərlərlə görüşdü. Yazıçı Pərvin Nurəliyevanın eyniadlı pyesi əsasında hazırlanan tamaşanın quruluşçu rejissoru Ayla Osmanovadır.
Tamaşada baş rolu – gənc Leyla obrazını istedadlı aktrisa Səbinə Məmmədova canlandırır. Onun estetik duyumu və aktyor oyunundakı dərinlik obrazla bir vəhdət təşkil edir. Leylanın yaşantıları, ağrıları, iç dünyasında qopub gələn suallar səhnədə tək bir nəfər tərəfindən çatdırılsa da, hər kəsin ürəyinə toxunur. Tamaşaçı Leylanın simasında təkcə bir qızın yox, bütöv bir cəmiyyətin təklənmiş, haqsızlığa düçar olmuş üzünü görür.
Crossmedia.az xəbər verir ki, ilk dəfə 2019-cu ilin martında Gənc Tamaşaçılar Teatrının kiçik səhnəsində təqdim olunan bu tamaşa, bu dəfə teatrın böyük səhnəsində nümayiş etdirildi. Tamaşa boyunca tək bir insanın taleyində toplandığı görünən faciə, əslində bir çox insanın yaşadığı, amma dilləndirməyə cəsarət etmədiyi emosional gərginliyi, psixoloji sarsıntını və ədalətə olan susuzluğu ortaya qoyur.
Leylanın hekayəsi – valideynlərinin sevgisiz münasibətindən doğan təkliklə başlayır. Anasının vəfatından sonra atasına dəstək olmaq üçün işləməyə çalışan Leyla, hər yeni iş yerində psixoloji zorakılıqla qarşılaşır. Hüquq təhsili alaraq qadın haqlarını müdafiə etməyə qərar verir, lakin bu dəfə də qarşısına çıxan nüfuzlu bir şəxsin duyğusal istismarı ilə üzləşir. Sevgi xəyalı da puç olan Leyla həyatın sınaqlarına tab gətirməyərək psixoloji dispanserə düşür. Tamaşanın əsas hadisələri də məhz bu dispanserdə, onun xatirələri üzərindən cərəyan edir.
“Mən öləndə, ağlama” tamaşası yalnız fərdi bir faciənin poetik təcəssümü deyil, həm də cəmiyyətə açıq bir çağırışdır: insan harada olursa-olsun, əgər azad deyilsə, deməli, onun yaşamaq hüququ əlindən alınıb. Və bu azadlıq – xüsusilə qadınlar üçün – təkcə hüquqi deyil, həm də mənəvi və psixoloji bir dəyərdir.
Aktrisa Səbinə Məmmədovanın güclü aktyor oyunu ilə canlanan Leyla obrazı, tamaşaya baxan hər kəsi öz daxili sualları ilə üz-üzə qoyur. Bu monotamaşa – sadə bir səhnə quruluşu ilə belə – min sözün ifadə edə bilməyəcəyi duyğuları, qəzəbi və fəryadı tamaşaçının qəlbinə köçürür.
Əgər səssiz bir qışqırığı eşitmək, bir qadının həyatla mübarizəsinə şahid olmaq istəyirsinizsə, bu tamaşa sizin üçün bir fürsətdir.
Ayan Sədi
23:00 18.04.2025
Oxunuş sayı: 13326
