Ev təmizləyici vasitələr allergik dəri reaksiyalarına səbəb ola bilər
Ev təmizliyi zamanı istifadə olunan kimyəvi vasitələr gündəlik həyatımızda vacib rol oynasa da, onların sağlamlığa təsiri tez-tez nəzərdən qaçırılır. Xüsusilə dəri ilə birbaşa təmasda olduqda bu vasitələr ciddi allergik reaksiyalara səbəb ola bilər.
Məsələ ilə bağlı dermatoloq Tünzalə Əzizli Crossmedia.az-a açıqlama verib.
Onun sözlərinə görə, ev təmizləyici vasitələrdən istifadə zamanı ehtiyatlı olmaq lazımdır. Bu cür kimyəvi maddələr bir çox insanlarda allergik dəri reaksiyalarına yol aça bilər. Təmizləyici vasitələrin tərkibindəki bəzi maddələr dəridə qızartı, yanma, göynəmə və qaşınma kimi əlamətlərlə özünü göstərə bilər:
“Uzun müddət bu maddələrin təsirinə məruz qalmaq nəticəsində bu hallar xroniki xarakter ala bilər. Ağır hallarda isə dəridə çatlar, qanayan və sulanan yaralar meydana çıxa bilər. Belə problemlərdən qorunmağın əsas yolu isə allergenlə təmasdan uzaq durmaqdır. Yəni allergiyaya səbəb olan vasitələrin istifadəsini minimuma endirmək və ya tamamilə dayandırmaq tövsiyə olunur”.
T.Əzizli onu da bildirib ki, bu maddələrdən istifadə qaçılmazdırsa, qoruyucu əlcəklərdən istifadə vacibdir:
“Bu vəziyyət insanlara, xüsusən də xanımlara həm sağlamlıq, həm də estetik baxımdan narahatlıq verə bilər. Dəridə, xüsusən də əllərdə baş verən dəyişikliklər kosmetik olaraq xoş görünmür və bu, bir çox insanlarda komplekslərə səbəb ola bilər. Belə hallar xəstənin həm fiziki, həm də psixoloji narahatlığına gətirib çıxarır”.
Nihat Tahirov
16:10 18.04.2025
Oxunuş sayı: 1106
