“Müqəvvanın mərhəməti” – Kukla Teatrında yeni premyera
3 may tarixində Azərbaycan Dövlət Kukla Teatrı daha bir maraqlı səhnə işi ilə balaca tamaşaçıların görüşünə gəlir. Teatrın səhnəsində bu dəfə Slovakiya yazıçısı Yaroslav Vadorajkanın “Müqəvva” pyesi əsasında hazırlanan “Leylək və Müqəvva” tamaşasının premyerası təqdim olunacaq.
Birhissəli uşaq tamaşası olan bu səhnə əsəri təbiətə sevgi və canlılar arasında sədaqət hissini ön plana çəkir. Tamaşanın əsas qəhrəmanları mərhəmətli Müqəvva, xilaskar Ağac və yaralı balaca leylək Aykodur. Pyesi Azərbaycan dilinə tərcümə edən Zümrüd Quliyeva, quruluşçu rejissoru isə Müşfiq Əliyevdir. Səhnə tərtibatı Rəvanə Yaqubovaya, musiqi tərtibatı isə təbiət və insan tandemi üzərində qurulmuş dinamik kompozisiyalarla tamamlanır.
Crossmedia.az xəbər verir ki, tamaşada şaxtadan donmuş bir ağac xilaskar, illərlə tarlada dayanmış Müqəvva isə həyatsevər bir qəhrəman kimi təqdim olunur. Səhnədə həmçinin hiyləgər Tülkü, dağıdıcı, amma sirdaşa çevrilən Külək kimi obrazlar da yer alır.
Hadisələr ibrətamiz və bir qədər kədərli səhnə ilə başlayır: əkin-biçin mövsümünün sonunda sahibi tərəfindən tərk edilən Müqəvva taleyi ilə barışmaq istəmir. Bu zaman isti ölkələrə köç edən leyləklərlə qarşılaşır və onlardan biri – qanadı qırılmış balaca leylək Ayko ilə dostlaşır. Müqəvva Aykonu sağaltmaq qərarına gəlir və qış boyu onu qurumuş ağacın iri gövdəsində qoruyur. Baharın gəlişi ilə sağalmış Ayko dostlarına qoşulub uçur, Müqəvva isə anlayır ki, faydalı olmaq üçün təkcə tarlada dayanmaq kifayət deyil. O, Küləklə birlikdə yeni yerlərə yollanır.
Personajları səhnədə canlandıran aktyor heyəti də diqqət çəkir:
Müqəvva – Elnur Xəlilov
Balaca leylək Ayko – Əməkdar artist Cəmilə Allahverdiyeva
Sərçə, Leylək – Nərmin Əhmədova
Tülkü, Leylək – Samirə Nəcəfova
Külək, Leylək, Ağac – Yusif Baxşəliyev
“Leylək və Müqəvva” tamaşası uşaqlara təbiətə sevgi, dostluq və mərhəmət hisslərini aşılayan, düşündürücü və bir o qədər də poetik bir əsərdir. Kukla Teatrının bu yeni layihəsi kiçik yaşlı tamaşaçılarla yanaşı, böyüklərin də qəlbinə toxunacaq.
Azərbaycan Dövlət Kukla Teatrı balacalara teatrın sehrini yaşatmaqda davam edir.
Ayan Sədi
20:00 18.04.2025
Oxunuş sayı: 9973
