Sumqayıt Dövlət Dram Teatrında “Sehirli Yaylıq” adlı yeni tamaşanın məşqlərinə start verildi
Sumqayıt Dövlət Dram Teatrında balaca tamaşaçılar üçün sevindirici bir yenilik hazırlanır. Gənc və istedadlı rejissor Fuad Cavadzadənin quruluşunda məşhur sənətkar, Azərbaycan SSRİ Əməkdar artisti Kərim Həsənovun “Sehirli Yaylıq” adlı əsəri əsasında yeni bir səhnə əsərinin məşqlərinə başlanılıb.
Fantastik elementlərlə zəngin olan tamaşa uşaqları sehrli dünyaya səyahətə aparacaq. Maraqlı süjet xətti, rəngarəng obrazlar və macəra dolu hadisələr kiçik yaşlı izləyicilərin teatr aləminə sevgisini daha da artıracaq.
Crossmedia.az xəbər verir ki, yeni səhnə əsərinin yaradıcı heyəti də olduqca zəngindir. Tamaşanın quruluşçu rəssamı Nizami Dadaşev, musiqi tərtibatçısı Zaur Rəşidov, xoreoqrafı Kamil Ağazadə, rejissor assistenti isə Fazilə Rzayevadır.
Tamaşada Əməkdar artistlər Sədaqət Nuriyeva və Elmira Kərimova ilə yanaşı, Mətləb Səfərli, Sevda Cəlilova, Vəfa Qurbanova, Rövşən Əsgərov, Ceyhun Məhərrəmov, Şəhla Məmmədova, Şəmistan Süleymanlı, Elay Xasıyev, İlahə Səfərova, Elmir Mehdiyev, Kamran Muradlı, Məryəm Hüseynli, Aynur Hümbətova, Emil Həmidov, Günəş Bağırsoy və Səid Hüseynov da çıxış edəcəklər.
“Sehirli Yaylıq” tamaşası May ayında teatrın səhnəsində nümayiş olunacaq.
Ayan Sədi
11:34 09.04.2025
Oxunuş sayı: 4495
