İsrailin Qərb Sahilindəki siyasəti ilə bağlı xəbərdarlıq edilib
BMT Baş katibi Antonio Quterreş işğal altındakı İordan çayının qərb sahilində zorakılıq, məcburi köçürülmə və İsrail yaşayış məntəqələrinin genişləndirilməsinin sülh perspektivlərini zəiflətdiyini və “etnik təmizləmə” riskini artırdığını bildirib.
Crossmedia.az xəbər verir ki, Quterreş bu fikirləri BMT Baş Assambleyasının 81-ci sessiyasının ümumi müzakirələri çərçivəsində səsləndirib. Sessiyanın ümumi debatları sentyabrın 22-dən 28-dək Nyu-Yorkda keçirilir.
Quterreş Qəzzadakı vəziyyətə də toxunaraq, oradakı dağıntı və insan tələfatının miqyasının BMT baş katibi olduğu illərdə şahidi olduğu hadisələrdən fərqləndiyini deyib. O, Qəzza ilə bağlı iki dövlətli həllin həyata keçirilməsinin vacibliyini vurğulayıb.
BMT rəhbəri Ukraynada cəbhə xəttindən uzaq ərazilərdə də mülki insanların öldürüldüyünü bildirib. O, həmçinin süni intellektin sürətli inkişafının risklərin idarə olunması və məsuliyyət məsələlərini ön plana çıxardığını qeyd edib.
Quterreş ölüm-dirim qərarlarının maşınlara həvalə edilməməli olduğunu və süni intellektdən istifadə zamanı hesabatlılığın təmin edilməsinin vacibliyini vurğulayıb. O, həmçinin BMT Təhlükəsizlik Şurasında Afrikanın daimi təmsilçiliyinin olmamasını ədalətsiz və müdafiəolunmaz hesab etdiyini bildirib.
19:21 22.09.2026
Oxunuş sayı: 220
