Şahzadə Harri anası Dianaya həsr olunan sənədli film çəkmək istəyir
Sussex hersoqu, şahzadə Harri anası, Uels şahzadəsi Diananın xatirəsinə həsr olunan sənədli film çəkməyi planlaşdırır.
Crossmedia.az xəbər verir ki, “The Telegraph” bu barədə məlumat yayıb.
Harri filmin nümayişini Diananın ölümünün 30-cu ildönümünə təsadüf etdirmək istəyir. Şahzadə Diana 31 avqust 1997-ci ildə Parisdə avtomobil qəzasında həlak olub.
Məlumata görə, şahzadə Harri sənədli film vasitəsilə anasının irsinə “ən mənalı şəkildə” ehtiram göstərmək niyyətindədir.
Nəşrin yazdığına görə, Harri Diananın dostları və ailə üzvləri, o cümlədən onun qardaşı, Spenser qrafı Çarlz Spenserlə əlaqə saxlayaraq onların sənədli filmdə iştirak edib-etməyəcəklərini soruşub.
Bununla belə, filmin çəkilməsi ilə bağlı hələ yekun qərar qəbul edilməyib. Hazırda Harri anasının xatirəsini hansı formada yad etməyin daha məqsədəuyğun olacağı ilə bağlı bir neçə variantı nəzərdən keçirir.
Mənbələrdən biri bildirib ki, layihə ilə bağlı hələ heç nə yekunlaşmayıb və təsdiqlənməyib. Harrinin bu mühüm ildönümündə anasının xatirəsini ən mənalı şəkildə necə yad edəcəyini düşündüyü qeyd olunub.
Bundan əvvəl sentyabr ayında “Daily Star” şahzadə Uilyamın əmisi, Spenser qrafı Çarlz Spenserin yeni kitabının nəşrindən sonra qəzəbləndiyini iddia edib.
“Swan Song” adlı memuarlarda Britaniya kral ailəsi ilə bağlı yeni ittihamların yer aldığı bildirilir. Kitabda, xüsusilə, Kral III Çarlzın Diananın ölümündən sonra onun haqqında danışarkən sanki “lotereyada udduğunu” söylədiyi və dünyanın tezliklə onu unudacağını bildirdiyi iddia olunur.
14:31 22.09.2026
Oxunuş sayı: 32
