Dərsliklər dəyişəcək - həm Azərbaycan dili, həm xarici dil dərslikləri...
Azərbaycanda məktəb dərsliklərinin məzmunu və keyfiyyəti ilə bağlı müzakirələr davam edir. Müasir təhsil tələbləri şagirdlərə təqdim olunan informasiyanın həm daha lakonik, həm də dəqiq olmasını zəruri edir. Dərsliklərin hazırlanması zamanı beynəlxalq təhsil göstəriciləri yüksək olan ölkələrin təcrübəsinin nəzərə alınması da vacib amillərdən biri hesab olunur. Hazırda Azərbaycan dili, xarici dillər və təbiət fənləri üzrə bəzi dərsliklərdə müəyyən çatışmazlıqların olduğu bildirilir. Ekspertlər hesab edirlər ki, mövcud nöqsanların aradan qaldırılması və yeni dərsliklərin hazırlanması üçün məsələnin ictimai müzakirəyə çıxarılması effektiv nəticə verə bilər.
Mövzu ilə bağlı təhsil eksperti Elçin Əfəndi Crossmedia.az-a açıqlamasında bildirib ki, dərsliklər yeni və müasir çağırışlara uyğun hazırlanmalıdır:
“Əlbəttə ki, dərsliklərimizdə Elm və Təhsil Nazirliyinin müəyyən etdiyi qərarlar əsasında şagirdlərə təqdim edilən məlumatlar əvvəlki dövrlərlə müqayisədə daha lakonik xarakter almalıdır. Eyni zamanda, verilən informasiyanın dəqiqliyi mütləq öz əksini tapmalıdır. Dərsliklər yeni, müasir çağırışlara uyğun və beynəlxalq müstəvidə təhsil göstəriciləri yüksək olan ölkələrin təcrübəsi nəzərə alınmaqla hazırlanmalıdır. Bu istiqamətdə Elm və Təhsil Nazirliyi tərəfindən müvafiq işlər görülür. Güman edirəm ki, gələcək illərdə mövcud təklif və çatışmazlıqlar nəzərə alınaraq yeni nəşr olunacaq dərsliklərlə tanış olacağıq. İstər Azərbaycan dili, istər xarici dil fənn blokuna daxil olan dillər, istərsə də təbiət fənləri üzrə dərsliklərin hər birində müəyyən qədər çatışmayan məqamlar var. Bir daha qeyd edirəm ki, bu çatışmazlıqların aradan qaldırılması üçün beynəlxalq sistemin tələblərinə uyğun dərsliklər hazırlamalıyıq".
Ekspert əlavə edib ki, komitənin də müəyyən etdiyi və dərsliklərdə görünən müəyyən nöqsanlar var: "Onların aradan qaldırılması üçün məsələ ictimai müzakirəyə çıxarılmalıdır. İnanıram ki, ümumi müzakirələrin də müsbət və effektiv nəticəsi olacaq.”
Zeynəb Həsən
16:00 11.09.2026
Oxunuş sayı: 46
