Silivridə iki Türk gəmisi toqquşdu
Silivri açıqlarında iki Türk bayraqlı ticarət gəmisi toqquşub, hadisədən sonra gəmilərdən birində olan 10 heyət üzvü ilə əlaqə saxlamaq mümkün olmayıb.
Crossmedia.az xəbər verir ki, İstanbul Valiliyi bu barədə məlumat yayıb.
Məlumata görə, hadisə 2 sentyabr 2026-cı il, çərşənbə günü saat 03:00 radələrində Silivri sahillərindən 18 dəniz mili cənubda baş verib. Kocaelidən Aliağaya gedən Türk bayraqlı ALSU ticarət gəmisi ilə İskəndərun limanından Karadeniz Ereğliyə hərəkət edən Türk bayraqlı TUĞBERK İMAMOĞLU ticarət gəmisi toqquşub.
Hadisə yerinə Sahil Təhlükəsizliyi, Sahil Mühafizə Marmara və Boğazlar Komandanlığının çoxsaylı dəniz vasitələri və sahil mühafizə helikopteri göndərilib.
İlkin məlumata əsasən, ALSU gəmisində görünən hər hansı ciddi zədələnmə qeydə alınmayıb.
TUĞBERK İMAMOĞLU gəmisi və onun göyərtəsində olan 10 heyət üzvü ilə isə hazırda əlaqə yaratmaq mümkün deyil. Bölgədə axtarış-xilasetmə işləri davam etdirilir.
09:16 02.09.2026
Oxunuş sayı: 69
