KİV: Putin Donbası 2027-ci ilin payızına qədər tam nəzarətə götürmək istəyir
Rusiya Prezidenti Vladimir Putin Donbas üzərində tam nəzarəti 2027-ci ilin payızına qədər təmin etməyi hədəfləyir və Kreml qışda Ukraynaya qarşı hərbi təzyiqi artırmağa hazırlaşır.
Crossmedia.az xəbər verir ki, “The New York Times” bu barədə məlumat yayıb.
Qərb rəsmiləri və analitiklərin qəzetə verdiyi məlumata görə, Moskva Donbasın tam ələ keçirilməsini Rusiyanın əsas hərbi və siyasi məqsədlərindən biri hesab edir. Əgər Rusiya ordusu 2027-ci ilin payızına qədər bu məqsədə nail ola bilməsə, danışıqların başlanması ehtimalının artacağı bildirilir.
Məlumata görə, Kreml yaxın aylarda Ukraynaya qarşı təzyiqi daha da artırmağa hazırlaşır. Qış aylarında Rusiya ordusunun Ukrayna mövqelərinə hücumları gücləndirə, eyni zamanda mülki və enerji infrastrukturuna zərbələrin intensivliyini artıra biləcəyi gözlənilir.
Qərb rəsmiləri Rusiyanın Ukraynadakı hava hücumundan müdafiə vasitələrinin çatışmazlığından istifadə etməyə çalışa biləcəyini düşünür. Bununla yanaşı, Rusiyada sentyabr ayında keçiriləcək parlament seçkilərindən sonra yeni səfərbərlik elan edilə biləcəyi də istisna edilmir.
Qərb tərəfi həmçinin Moskvanın Avropada hibrid hücumlarla məhdudlaşmayan daha geniş eskalasiyaya gedərək NATO-nun reaksiyasını yoxlamağa cəhd edə biləcəyindən narahatdır.
Bununla belə, 2027-ci ilin payızı Rusiyanın Donbası tam nəzarətə götürəcəyinə zəmanət verən tarix deyil. Qərb rəsmiləri və analitiklər bunu Moskvanın qarşısına qoyduğu hədəf və mümkün dönüş nöqtəsi kimi qiymətləndirirlər.
12:45 17.08.2026
Oxunuş sayı: 53
