Akademik İsa Həbibbəyli Qəbələdə aparılan arxeoloji tədqiqatlarla tanış olub
AMEA-nın prezidenti, akademik İsa Həbibəyli Qəbələ Dövlət Tarix-Bədii Qoruğunda aparılan arxeoloji qazıntı işləri ilə tanış olub.
Crossmedia.az xəbər verir ki, akademik İsa Həbibbəyli bildirib ki, UNESCO-nun Dünya İrsinin İlkin Siyahısına daxil edilmiş Qədim Qəbələ şəhəri Azərbaycanın, eləcə də dünya tarixinin öyrənilməsində xüsusi yeri olan bir abidədir. Azərbaycan xalqının qədim dövlətçilik və şəhərsalma mədəniyyətinə sahibliyini göstərən bu abidənin daim AMEA-nın prioritet tədqiqat mövzularından biri olduğunu deyən akademik İsa Həbibbəyli arxeoloji qazıntı sahələrində aparılan tədqiqat işlərini yüksək dəyərləndirib.
AMEA Arxeologiya və Antropologiya İnstitutunun İslam dövrü arxeologiyası şöbəsinin müdiri, Qəbələ Arxeoloji Ekspedisiyasının rəhbəri, tarix elmləri doktoru, professor Qafar Cəbiyev Qədim Qəbələnin Qala adlanan ərazisində cari dövrdə aparılan qazıntılar və onların ilkin elmi nəticələri barədə ətraflı məlumat verib.
Professor bildirib ki, Qafqaz Albaniyasının ilk paytaxtı olmuş Qədim Qəbələ şəhər yerində cari mövsümdə III qazıntı sahəsində araşdırmalar davam etdirilib. Qazıntılar zamanı iri yonulmuş daşlardan inşa edilmiş saray tipli ictimai binanın qalıqları aşkar olunub. Üzə çıxarılan tikilinin uzunluğu 18 metr, hündürlüyü isə 1,8 metrdir. Tikilinin şərq istiqamətində davam etməsi onun daha böyük bir kompleksin tərkib hissəsi olduğunu ehtimal etməyə əsas verir. Tədqiqat aparılan 220 kvadratmetrlik sahədə erkən orta əsrlərdən XVIII əsrədək olan dövrü əhatə edən dörd tikinti qatı və döşəmə qalıqları qeydə alınıb. Bununla yanaşı, müxtəlif təyinatlı keramika nümunələri, o cümlədən şirli və şirsiz məişət qabları aşkar edilib. Professor qafar Cəbiyev qeyd edib ki, yeni tapıntılar Qədim Qəbələ sakinlərinin məişətini, mədəniyyətini və sənətkarlıq ənənələrini öyrənmək, eləcə də şəhərin Azərbaycanın ictimai-siyasi və mədəni həyatındakı rolunu daha dərindən araşdırmaq baxımından mühüm əhəmiyyət daşıyır.
Sonra Qəbələnin arxeoloji irsinin tədqiqi, maddi mədəniyyət nümunələrinin qorunması və arxeoloji qalıqların konservasiyası ilə bağlı fikir mübadiləsi aparılıb.
Sonda AMEA-nın prezidenti, akademik İsa Həbibbəyli çıxış edərək arxeoloji tədqiqat sahələrinin daha da genişləndirilməsinin vacibliyini bildirib, müvafiq tövsiyə və tapşırıqlarını diqqətə çatdırıb.
Tədbirdə AMEA Arxeologiya və Antropologiya İnstitutunun direktoru, tarix üzrə fəlsəfə doktoru, dosent Fərhad Quliyev və ekspedisiya üzvləri də iştirak ediblər.
17:18 31.07.2026
Oxunuş sayı: 45
