Sosium
Azərbaycanda məhkumların ali təhsil hüququ təmin ediləcək?- AÇIQLAMA
Yaxın gələcəkdə cəzaçəkmə müəssisələrində ali təhsil verilməsi gözlənilir. Hazırda məsələ ilə bağlı danışıqlar aparılır. Türkiyədə tətbiq edilən bu modelin Azərbaycanda da distant təhsil formasında həyata keçirilməsi nəzərdə tutulur. Gələn ildən məhbus qadınlar, kişilər və yeniyetmələr üçün müxtəlif təhsil və oxu marafonlarının təşkili planlaşdırılır. Bəs layihənin təhsil sisteminə inteqrasiyası necə həyata keçiriləcək?
Distant təhsil anlayışı bu təşəbbüsü tam dəstəkləmək üçün kifayət edirmi, yoxsa hüquqi çərçivədə yeniliklər tələb olunur?
Məsələ ilə bağlı Crossmedia.az saytına açıqlama verən təhsil eksperti Rizvan Fikrətoğlu bildirib ki, bir sıra həbsxanalarda orta təhsilin təşkili həyata keçirilir:
“Bu, əsasən 9 və 11 illik təhsil formalarını əhatə edir. Həbsxana daxilində təşkil olunan dərslər xüsusi təyin edilmiş müəllimlər tərəfindən və tam nəzarət altında aparılır. Hətta Dövlət İmtahan Mərkəzi sözügedən cəzaçəkmə müəssisələrində buraxılış imtahanları keçirir. Orta təhsilin həbsxanalarda qismən təmin olunması mümkün olsa da, ali təhsilin təşkil edilməsi də əhəmiyyətli bir addım olardı. Həbsdə olan şəxslər də bizim vətəndaşlarımızdır və onların təhsil hüququ məhdudlaşdırılmamalıdır. Həbsxana, yanlış hərəkətlərin cəzasını çəkmək üçün nəzərdə tutulan bir müəssisədir. Məhkumlar cəzalarını başa vurduqdan sonra yenidən cəmiyyətə inteqrasiya olunurlar. Belə insanlar üçün ali təhsilin təmin edilməsi olduqca yaxşı olardı. İnsanların günahı olması, onların hər şeydən, eləcə də ali təhsildən məhrum edilməsinə səbəb deyil”.
R. Fikrətoğlu ödənişli təhsil alacaq olan məhkumların da vəziyyətinə nəzər yetirib:
“Məhkumların maddi imkanları kifayət etmədiyi təqdirdə, Təhsil Tələbə Kredit Fondunun bu layihəyə dəstək göstərəcəyini düşünürəm. Azərbaycanda distant təhsil rəsmi olaraq təsdiq edilməmiş bir təhsil formasıdır. Hazırda yalnız əyani və qiyabi təhsil formaları mövcuddur. Halbuki bir çox inkişaf etmiş ölkələrdə distant təhsil qanuniləşdirilib və geniş tətbiq edilir. Bu təhsil forması məhkumlar üçün xüsusilə əlverişlidir, çünki onları universitetə aparıb-gətirmək mümkün görünmür. Eyni zamanda, qiyabi təhsil də alternativ bir yol kimi nəzərdən keçirilə bilər. Məhkumlar müəyyən müddət ərzində imtahanlarda iştirak etməklə bu prosesi davam etdirə bilərlər. Bu yanaşma həm maddi, həm də insan resurslarının qənaətinə imkan yaradar. Universitetlərlə yanaşı peşə məktəbləri və kolleclər də bu prosesə hazırdırlar. Orta ixtisas və peşə təhsilini də nəzərə alsaq, distant təhsil forması məqbul hesab oluna bilər”.
Gülay Məmmədova
12:23 23.12.2024
Oxunuş sayı: 23113
