Hər kəs media savadlı olmalıdır
16-22 dekabr tarixlərində Medianın İnkişafı Agentliyi tərəfindən “Media Savadlılığı” həftəsi təşkil olunub. Məqsəd, cəmiyyətdə media savadlılığı ilə bağlı məlumatlılığı artırmaq, beynəlxalq təcrübələri öyrənmək və gənclərin bu sahədə bilik və bacarıqlarını təkmilləşdirməkdir.
Həftə ərzində iştirakçılara informasiya mənbələrindən düzgün və effektiv istifadə yolları öyrədiləcək, məsuliyyətli rəqəmsal vətəndaşlıq prinsipləri təşviq ediləcək. Tədbir çərçivəsində həm yerli, həm də xarici ekspertlər öz təcrübələrini paylaşacaq, müxtəlif tərəfdaş qurumların nümayəndələri ilə müzakirələr aparılacaq.
Medianın İnkişafı Agentliyinin hər il ənənəvi olaraq keçirdiyi bu həftə, media savadlılığının müxtəlif aspektlərini əhatə edən layihələrlə fərqlənir. Xüsusilə, gənclərin biliklərinin artırılması və onların rəqəmsal məkanda daha şüurlu davranışlarının təşviqi həftənin əsas prioritetlərindən biridir.
BDU-nun Jurnalistika fakültəsinin Yeni Media və Kommunikasiya nəzəriyyəsi kafedrasının müdiri, dosent Xatirə Hüseynova Crossmedia.az-a açıqlamasında media savadlılığının mahiyyəti, bu sahədə Azərbaycanda görülən işlər və gələcəkdə atıla biləcək addımlarla bağlı fikirlərini bölüşüb.
Xatirə Hüseynova media savadlılığını izləyicilərə təqdim olunan məzmunu qiymətləndirmə və analitik düşüncə qabiliyyətini inkişaf etdirən bir sahə kimi xarakterizə edib:
“Media savadlılığı media məhsulunu qiymətləndirmək, faktları təhlil etmək və analitik düşüncə tərzini inkişaf etdirmək bacarığıdır. Media savadlı fərd informasiyanı qəbul etmək, təhlil etmək, qiymətləndirmək bacarıqlarına sahib olmaqla yanaşı, özü də yeni media kontenti yaradıb yayımlaya bilir”.
O, əlavə edib ki, media savadlı olmaq aramsız informasiya axınında medianın istifadə etdiyi kodları anlamaq, dezinformasiyadan qorunmaq və doğru faktlara əsaslanaraq faydalı kontent yaratmağı bacarmaq deməkdir.
Hüseynova müasir dövrdə hər bir fərdin, texnologiyaya çıxışı olan istənilən şəxsin yalnız xəbər istehlakçısı deyil, həm də istehsalçısı olduğuna diqqət çəkib:
“Media təhsili almayan və hazırlıqsız oxucu yalnız saxta xəbərlərin təsirinə düşməklə kifayətlənmir, həm də onları yaymaqla dezinformasiyanın sürətlə yayılmasına səbəb olur. Bu baxımdan media savadlılığı böyük önəm daşıyır”.
Xatirə Hüseynova qeyd edib ki, son illərdə Azərbaycanda media savadlılığının artırılması ilə bağlı bir sıra müsbət addımlar atılıb:
“MEDİA Agentliyinin təşkilatçılığı ilə keçirilən və hazırda davam edən ‘Media Savadlılığı’ Həftəsi bu sahədə görülən işlərin bariz nümunəsidir. Bununla yanaşı, agentliyin təşkil etdiyi təlimlər, seminarlar, konfranslar və istifadəyə verilən ‘medialiteracy.media.gov.az’ portalı da təqdirəlayiq addımlardandır. Media haqqında Azərbaycan Respublikasının Qanununda media savadlılığı ilə bağlı bəndin olması isə bu sahənin aktuallığını bir daha sübut edir”.
O, həmçinin Azərbaycanın son dövrlərdə ciddi informasiya təhdidləri ilə üzləşdiyini vurğulayıb və bu kontekstdə media savadlılığının daha da inkişaf etdirilməsinin vacibliyini önə çəkib.
Xatirə Hüseynova bir sıra ölkələrdə, o cümlədən Türkiyədə yeniyetmələrə orta məktəb illərindən media savadlılığının tədris olunmasının müsbət nəticələr verdiyini bildirib:
“Fikrimcə, oxuduqları ixtisasdan asılı olmayaraq, bütün tələbələrin media savadlı gənclər kimi yetişməsi üçün media savadlılığının tədris planlarına daxil edilməsi çox önəmlidir”.
Hüseynova bildirib ki, bu addımlar Azərbaycanın media savadlı cəmiyyətə çevrilməsinə və dezinformasiyalara qarşı daha dayanıqlı olmasına xidmət edəcək.
Nihat Tahirov
14:35 19.12.2024
Oxunuş sayı: 6822
