Suriyalı qaçqınlar öz ölkələrinə qayıdacaqmı?
Suriyada Bəşər Əsəd rejiminin süqutundan sonra həlli vacib olan əsas məsələlərdən biri də suriyalı mühacirlərin ölkələrinə qayıtmasıdır.
Bəs Bəşər Əsəd rejiminin süqutundan sonra Suriyada təhlükəsizlik təmin olunarsa, Türkiyədəki suriyalı mühacirlərin qayıdışı hansı yollarla həyata keçiriləcək?
Bu mövzuyla bağlı siyasi şərhçi Elmir Səftərov Crossmedia.az-a müsahibəsində bildirib ki:
“Bəşər Əsədin devrilməsindən sonra gündəm mövzularından biri də suriyalıların öz ölkələrinə geri qayıdışı məsələsidir. Lakin bu, o qədər də asan proses deyil və özlüyündə təhlükəsizlik tədbirlərini ehtiva edir. Ümumilikdə, uzun illər qaçqın şəraitində yaşamış insanların öz ölkələrində sabitlik olsa belə, yenidən eyni problemlərlə qarşılaşma ehtimalları onların geri qayıdışına müəyyən problemlər yarada bilər."
Yeni qurulacaq Suriya hökuməti mühacirlərin geri dönməsi üçün hansı şərait və təminatları təklif edə bilər?
Milyonlarla suriyalıya qucaq açan Türkiyə, ölkədə sabitlik yarandıqdan sonra könüllü və təhlükəsiz qayıdışın tərəfdarıdır və bu istiqamətdə əlindən gələni edir. Əsas məsələ isə Suriyanın yeni hakimiyyətinin qurulması, ölkədə təhlükəsizlik mühitinin yaradılması və qaçqınlara olan yanaşmasıdır ki, bu da kütləvi qayıdışa öz təsirini göstərəcək.
Ümumilikdə isə suriyalıların geri qayıdışı o qədər də asan olmayacaq. Bunun üçün kifayət qədər maddi resurs da lazımdır. Avropa İttifaqı və bəzi beynəlxalq təşkilatların bu prosesə ciddi töhfə verməsi vacibdir.
Fidan Fərhad
07:42 18.12.2024
Oxunuş sayı: 6936
