Sosium

Kirayə bazarında bahalaşma: Qiymətlərdəki artım narahatlıq doğurur

Son dövrlərdə kirayə ev bazarında müşahidə olunan qiymət artımı həm yerli sakinlərin, həm də paytaxtda yaşayan tələbə və işçilərin diqqət mərkəzindədir.

Xüsusilə Bakıda kirayə mənzillərə olan tələbatın artması ilə paralel olaraq qiymətlərin də sürətlə yüksəlməsi müşahidə edilir. Bu vəziyyət vətəndaşlar üçün maddi problemlərə yol açır.

Mövzu ilə bağlı Crossmedia.az-a açıqlama verən Azərbaycan Qiymətləndiricilər Cəmiyyətinin (AQC) sədri Vüqar Oruc bildirib ki, kirayə mənzillərin qiyməti əsasən yerləşdiyi əraziyə görə dəyişir:

“Bu daha çox kirayə mənzilin hansı ərazidə yerləşməsindən asılıdır. Əgər mərkəzdədirsə, qiymətlər spesifik olaraq daha yüksəkdir. Mərkəzə yaxın ərazilərdə qiymətlər orta səviyyədədir. Ucqar yerlərdə isə qiymətlər daha aşağı olur”.

Vüqar Oruc kirayə bazarında əsasən birotaqlı mənzillərə tələbatın üstünlük təşkil etdiyini vurğulayıb:

“Ümumilikdə, hazırda əhalinin tələbi bir və iki otaqlı mənzillərədir. Adətən 45-60 m² sahəyə malik mənzillər seçilir, çünki bu mənzillərdə dəyişiklik edərək bir otağı iki otağa çevirmək mümkündür. Birotaqlı mənzillərin kirayəsi adətən 400-600 manat arasında dəyişir. İki otaqlı mənzillər isə birotaqlı mənzillərlə müqayisədə 20-25% daha bahadır”.

Ekspert qeyd edib ki, şəhərin müxtəlif ərazilərində kirayə qiymətləri fərqlidir:

“Nərimanov, Xətai, Yasamal və Nəsimi rayonlarında qiymət artımı daha nəzərə çarpandır. Ucqar ərazilərdə qiymətlər 350-400 manat arasında dəyişir, mərkəzə yaxın yerlərdə 500-700 manat, şəhər mərkəzində isə 800-1000 manat təşkil edir”.

Vüqar Oruc bölgələrdəki kirayə qiymətləri haqqında da danışıb:

“Bölgələrdə kirayə qiymətləri daha aşağıdır. Sosial-iqtisadi inkişaf və tələbatın aşağı səviyyədə olması səbəbindən qiymətlər Bakıya nisbətən ucuzdur. Qarabağ və ətraf ərazilərdə infrastruktur inkişaf etdikcə, həmin yerlərdə qiymətlər daha yüksəkdir. İşçi qüvvəsinə tələbat bu ərazilərdə kirayə qiymətlərinin artmasına səbəb olur”.

Ekspert kirayə bazarındakı artımın büdcəyə mənfi təsirlərini də vurğulayıb:

“Kirayə bazarı xüsusən Bakı şəhərində dinamik inkişaf edən bir sektordur. Son 10 illə müqayisədə mənzillərin qiymətləri 200-220% artıb. Bu qiymət artımı büdcənin yüklənməsinə və yaşayış standartlarının pisləşməsinə səbəb olur”.

Bu tendensiya, kirayə bazarının həm tələbat, həm də qiymət baxımından inkişafda olduğunu göstərir.

Saida Ramazanova