Azərbaycanlı marketoloqlar xarici həmkarlarından nə ilə fərqlənirlər? – Ekspertdən AÇIQLAMA
Son illərdə Azərbaycanın marketinq sahəsində nəzərə çarpan dəyişikliklər müşahidə olunur. Sürətli inkişafla yanaşı, bəzi struktur problemlər və sistematik boşluqlar da diqqət çəkir.
Mövzu ilə bağlı Crossmedia.az olaraq marketoloq Səfər Aslanovdan açıqlama aldıq.
Güclü tərəflər: Lokal kontekstə uyğunlaşma və yaradıcı yanaşma
Səfər Aslanov bildirib ki, Azərbaycanın marketinq sahəsi nəzərə çarpacaq dərəcədə inkişaf etsə də, hələ də formalaşma mərhələsini tam başa vurmayıb:
“Azərbaycanlı marketoloqların güclü tərəflərindən biri lokal kontekstə uyğunlaşma qabiliyyətidir. Onların yerli mədəniyyət və istehlakçı davranışları haqqında dərin bilikləri xüsusilə etnomarketinq sahəsində üstünlük yaradır. Lokal mədəniyyətə inteqrasiya olunmuş kampaniyalar hazırlamaq bacarığı regional bazarlarda rəqabət üstünlüyü təmin edir. Bununla yanaşı, məhdud resurslarla yüksək təsirgücünə malik kampaniyalar hazırlamaq bacarığı və qeyri-formal kommunikasiya kanallarının istifadəsi yaradıcı yanaşmanın mühüm nümunələridir.”
Zəif tərəflər: Strateji yanaşma və rəqəmsal texnologiyaların əskikliyi
Ekspert, Azərbaycanın marketinq sahəsində mövcud zəif tərəfləri də vurğulayıb:
“Azərbaycanda marketinq fəaliyyəti əsasən taktiki səviyyədə aparılır və qısa müddətli məqsədlərə yönəlir. Xarici bazarlarda isə strateji marketinq və uzunmüddətli planlaşdırmaya üstünlük verilir. Rəqəmsal marketinq və data analitikasının tətbiqi məhduddur. Xarici marketoloqların qərar vermə prosesində data əsaslı yanaşmaya üstünlük verdiyi halda, Azərbaycanda məlumat toplama və təhlil mexanizmləri kifayət qədər inkişaf etməyib. Təhsil və ixtisaslaşma səviyyəsi də əsas fərqlərdəndir. Xarici marketoloqlar beynəlxalq sertifikatlaşdırma proqramlarından daha geniş istifadə edir. Azərbaycanda isə bu imkanlar mövcud olsa da, müraciət edənlərin sayı məhduddur.”
Texnologiyaların tətbiqi və inkişaf perspektivləri
Səfər Aslanov texnoloji inkişafda da geriliyi qeyd edib:
“Xarici bazarlarda süni intellekt, avtomatlaşdırma və qabaqcıl analitika vasitələri geniş tətbiq olunur. Azərbaycanda isə bu texnologiyalar hələ ilkin mərhələdədir. Beynəlxalq təlimlərə və konfranslara cəlb olunmaq, həmçinin rəqəmsal texnologiyaların geniş tətbiqi yerli marketoloqların qlobal standartlarla uyğunlaşmasını sürətləndirəcək.”
Marketoloq əlavə edib ki, strateji düşüncə tərzinin formalaşdırılması, rəqəmsal texnologiyaların genişləndirilməsi və qlobal təcrübənin yerli kontekstə uyğunlaşdırılması Azərbaycanın marketinq sahəsində beynəlxalq rəqabət qabiliyyətini artıracaqdır.
Marketoloq Səfər Aslanovun vurğuladığı kimi, Azərbaycanlı marketoloqların güclü tərəfləri və yaradıcı yanaşmaları, ölkənin marketinq sahəsində beynəlxalq səviyyədə rəqabət qabiliyyətini artırmaq potensialına malikdir. Gələcəkdə bu sahədə atılacaq addımlar, Azərbaycanın marketinq dünyasında yeni uğurlara imza atmasına şərait yaradacaq.
Samirə Şərif
12:49 10.12.2024
Oxunuş sayı: 17865
