Elm və təhsil
Mərkəzi Elmi Kitabxana İstanbulda keçirilən beynəlxalq festivalda təmsil olunur
Azərbaycan Milli Elmlər Akademiyasının (AMEA) Mərkəzi Elmi Kitabxanasının (MEK) direktoru texnika elmləri doktoru Hüseyn Hüseynov, Rəqəmsallaşdırma və innovasiya üzrə direktor müavini tarix üzrə fəlsəfə doktoru Oruc Quliyev, Süni intellekt və rəqəmsal kitabxana şöbəsinin baş mütəxəssisi fizika-riyaziyyat üzrə fəlsəfə doktoru Azad Qurbanov və AMEA-nın Elmi İrs şöbəsinin baş mütəxəssisi Ramin Həsənov Türkiyədə keçirilən III Beynəlxalq Kitabxana və Texnologiya Festivalında iştirak edirlər.
Crossmedia.az xəbər verir ki, artıq üçüncü dəfə təşkil olunan festivalın builki mövzusu “Sağaldan Kitabxana”dır. 2–4 aprel tarixlərində Rami Kitabxanasında keçirilən tədbir bu sahədə əlçatanlıq və inklüzivliyin gücləndirilməsi, oxucu məmnuniyyətinin artırılması məqsədi daşıyır. Festival İT həlləri istehsalçılarını, rəqəmsal xidmət təqdimatçılarını və 2000-dən artıq iştirakçını bir platformada birləşdirərək kitabxanaçılıq sektoru ilə texnologiya dünyası arasında əməkdaşlıq imkanlarını genişləndirir.
Festivalın ilk günü təşkil olunan panel iclaslarda MEK nümayəndələri kitabxanalarda süni intellekt və müasir informasiya texnologiyalarına əsaslanan rəqəmsal innovasiyaların tətbiqi və perspektivləri barədə müzakirələrə qoşulublar.
Tədbir çərçivəsində kitab və arxiv sənədlərinin qorunması üçün vacib olan dezinfeksiya və klimat-kontrol texnologiyaları ilə tanışlıq olub, kitabxanalar üçün İT həlləri və avadanlıqlar hazırlayan şirkətlərlə görüşlər keçirilib, təqdim olunan texnoloji imkanların MEK-də tətbiqi perspektivləri dəyərləndirilib. Türkiyənin akademik kitabxanaları ilə əməkdaşlıq edən şirkətlərlə AMEA-nın korporativ rəqəmsal kitabxana sisteminin qurulmasına texniki dəstək istiqamətində ilkin razılıqlar da əldə olunub.
Bundan əlavə, festivalda təqdim olunan ağıllı kitabxana idarəetmə sistemləri üzrə ixtisaslaşmış şirkətlərlə texnoloji həllər barədə fikir mübadiləsi aparılıb, IFLA-ya üzvlük məsələsi, həmçinin EBSCO, Elsevier və digər beynəlxalq şirkətlərin Türkiyə nümayəndələri ilə rəqəmsal kitabxanalar və məlumat bazalarına çıxış imkanları ilə bağlı səmərəli müzakirələr keçirilib. Akademik resursların yayımı sahəsində fəaliyyət göstərən Hiperkitab və digər platformalarla əməkdaşlıq imkanları da diqqət mərkəzində olub. Qeyd olunub ki, 2025-ci ilin sentyabrında əldə edilmiş razılığa əsasən, MEK Azərbaycanda Hiperkitab platformasının resurslarına çıxış əldə edən yeganə kitabxanadır və artıq kitabxana tərəfindən rəqəmsallaşdırılmış 500-ə yaxın Azərbaycan nəşri bu sistemdə yerləşdirilib. Cari görüşdə əməkdaşlığın genişləndirilməsi istiqamətində əlavə addımlar da müzakirə olunub.
Səfər zamanı MEK-in direktoru Hüseyn Hüseynovun Türkiyənin Mədəniyyət və Turizm Nazirliyinin nümayəndələri, aparıcı kitabxana rəhbərlərinin iştirakı ilə Türkiyənin Mədəniyyət və Turizm Nazirliyinin Kitabxanalar və Yayımlar Baş İdarəsinin rəhbəri Taner Bəyoğlu və Rami Kitabxanasının rəhbəri Əli Çelik ilə işgüzar görüşü baş tutub. Kitabxanalar arasında əməkdaşlığın genişləndirilməsi, qabaqcıl təcrübələrin öyrənilməsi, elmi və mədəni əlaqələrin inkişafı, kitab və informasiya mübadiləsi, birgə layihələrin hazırlanması, eləcə də rəqəmsal kitabxanaların vahid platformada inteqrasiyası kimi məsələlər ətrafında fikir mübadiləsi aparılıb.
Daha sonra MEK tərəfindən hazırlanmış biblioqrafik məlumat kitablarının Rami Kitabxanasındakı kolleksiya otağına baxış keçirilib.
12:30 03.04.2026
Oxunuş sayı: 144
