“Populyar olan zəif ideoqrafiyalı köhnə filmlərimiz də var”
Filmlər zamanın aynasıdır. Klassik filmlərin üzərində dayandıqda, onların həm cazibədar, həm də mürəkkəb tərəflərini görmək mümkündür. İlk səssiz filmlərdən tutmuş, səsli və rəngli filmlərin inqilabi təsirlərinə qədər, kino özəl bir sənət formasıdır. Klassik filmlər isə bu inkişafın təməl daşı kimi dayanır və hər biri öz dövrünün incəsənət irsini əks etdirir.
Köhnə filmləri analiz etmək, bir növ zaman səfərinə çıxmaq kimidir. Bu filmlərdəki ssenari, görüntü və səs keyfiyyəti bəzən bugünkü standartlara uyğun olmasa da, onların mədəni və tarixi dəyəri çox böyükdür.
Mövzu ilə bağlı Crossmedia.az olaraq Azərbaycan Respublikasının əməkdar mədəniyyət işçisi və kinoşünası Aydın Kazımzadəyə müraciət etdik:
“Klassik filmləri analiz etmək maraqlı və çətin ola bilər. Köhnə filmlərin güclü və zəif tərəflərini nəzərə almaq vacibdir. Hər bir film öz dövrünün məhsuludur və yalnız texniki keyfiyyətləri ilə deyil, həm də mədəni və tarixi əhəmiyyəti ilə ölçülməlidir. Bu filmləri balanslı şəkildə qiymətləndirmək lazımdır. Klassik kinoların özünəməxsus bir cazibəsi və tarixi dəyəri var, lakin bəzi texniki məhdudiyyətlər də zəif tərəflərini təşkil edir. Köhnə texnologiyaların istifadəsi səbəbindən görüntü və səs keyfiyyəti bugünkü standartlara uyğun olmaya bilər. Bir çox hallarda, bu filmlər bir sessiya buraxılıb, ikinci sessiya buraxılmamışdır. Çünki izləyicisi olmamışdır. Bu da tamaşaçının məmnuniyyətinin azalmasına səbəb olur”.
Aydın Kazımzadə köhnə filmlərin ideyasının çox dərin olmadığını bildirib:
“Texniki imkanların məhdud olması səbəbindən hekayənin çatdırılması da bəzi hallarda zəif ola, görüntü keyfiyyəti, səs dizaynı və xüsusi effektlər bugünkü standartlara uyğun olmaya bilər. O dövrdə istifadə edilən rejissor texnikaları bəzən bugünkü tamaşaçılara köhnəlmiş və maraqsız gələ bilər. Bununla belə, bu filmlər dövrün mədəni və sosial dəyərlərini əks etdirir və bu da onların nostalji və tarixi dəyərini artırır. İnsanlar həmin dövrlərə aid xatirələri canlandıran filmləri bəyənirlər”.
Kazımzadənin fikirləri, köhnə filmlərin ideyalarının çox da dərin olmadığını vurğulaması, maraqlıdır. Bu cür tənqidlər, klassik kinoları yenidən kəşf etmək və daha dərin bir şəkildə qiymətləndirmək üçün insanları düşündürür. Köhnə filmlərin incəliklərini daha yaxından araşdırmağa çağırış kimidir.
Samirə Şərif
12:35 09.12.2024
Oxunuş sayı: 5551
