Yaşı 60-dan yuxarı olan işçilərin işdən çıxarılmama hüququ gəlir?
İnsan hüquqları üzrə müvəkkilin 2025-ci il məruzəsinə əsasən, 60 yaşdan yuxarı şəxslərin əmək müqaviləsinə xitam verilməsi qadağan edilə bilər.
Hazırkı qanunvericilikdə bu qadağa yalnız hamilə qadınlar, üç yaşınadək uşağı olan valideynlər və əmək qabiliyyətini müvəqqəti itirən işçilərə şamil olunur.
Təklif olunur ki, əmək müqaviləsinə xitam verilməyən işçilərin siyahısı genişləndirilsin.
Məruzədə həmçinin dövlət qulluğunda azı 35 il iş stajı olan şəxslərin güzəştli şərtlərlə əmək pensiyası hüququna malik olmaları qeyd edilib. Milli Məclisin İnsan hüquqları komitəsi bu təklifləri müzakirəyə çıxarıb.
Cross Media Təhlil Mərkəzinin analitiki, iqtisad üzrə fəlsəfə doktoru, dos. Aqil Eyvazovun sözlərinə görə, Azərbaycanda əmək müqaviləsinə xitam verilməsi qadağan olunan şəxslərin siyahısının genişləndirilməsi ilə bağlı təklif sosial müdafiə baxımından əhəmiyyətli təşəbbüsdür:
"Xüsusilə 60 yaşdan yuxarı şəxslərin işdən azad olunmasının məhdudlaşdırılması yaşlı əmək resurslarının qorunmasına və sosial həssas qrupların gəlir sabitliyinə xidmət edə bilər. Müasir iqtisadi şəraitdə əmək bazarında yaş diskriminasiyası riski mövcuddur və bu yanaşma həmin risklərin azaldılmasına yönəlib.
Digər tərəfdən, məsələnin iqtisadi tərəfi də nəzərə alınmalıdır. İşəgötürən üçün əmək münasibətlərində çevikliyin azalması biznes qərarlarının qəbulunu çətinləşdirə bilər.
Xüsusilə, özəl sektorda əmək məhsuldarlığı, texnoloji dəyişikliklər və kadr optimallaşdırması amilləri mühüm rol oynayır. Qadağaların genişləndirilməsi bəzi hallarda işə qəbul prosesinə də təsir göstərə və işəgötürənlərin risk davranışını dəyişə bilər".
A.Eyvazov əlavə edib ki, dövlət qulluğunda uzunmüddətli staja malik şəxslərə güzəştli pensiya hüququnun verilməsi isə sosial ədalət baxımından əsaslandırıla bilər, lakin bu addımın fiskal yükü də diqqətlə qiymətləndirilməlidir:
"Ümumilikdə, təklifin sosial məqsədi aydındır, lakin iqtisadi nəticələrinin də paralel analiz edilməsi vacibdir".
Fatimə Məmmədova
15:25 27.02.2026
Oxunuş sayı: 1514
