Gündəm

Ramiz Mehdiyev üçün təkcə ev dustaqlığı kifayət etmir

Bir neçə aydır dövlətə xəyanət və cinayət yolu ilə vəsait leqallaşdırmaqda təqsirli bilinən Prezident Administrasiyasının sabiq rəhbəri Ramiz Mehdiyev 17 milyon manatdan çox pulla bağlı qanunsuz əməllərdə ittiham olunur. Dövlət Təhlükəsizliyi Xidmətinin açıqlamasına görə, Mehdiyev həmçinin xarici dövlət orqanlarının köməyi ilə ölkədə dövlət hakimiyyətinə təsir göstərməyə və konstitusiya quruluşunu dəyişməyə çalışıb.

Bu ittihamlar və Mehdiyevlə bağlı mümkün qərar barədə Crossmedia.az-a danışan politoloq Əhəd Məmmədli söyləyib ki," Artıq “yaşlıdır, həbsxanada dünyasını dəyişər” kimi bəhanələr qəbul edilməməli və o, dərhal həbs edilməlidir: "Bunun üçün isə təkcə ev dustaqlığı kifayət etmir, çünki ittihamlar çox ciddidir – müxtəlif kəşfiyyatlarla əlaqə, vətənə xəyanət və digər halları əhatə edir.

Məsələdə həm müxalifət, həm də iqtidar milli mövqedən çıxış etməlidir, əks halda bu kimi halların baş verməsi qaçılmazdır. Belə ki, Ramiz Mehdiyev əvvəllər dövlətimizin əsas simalarından olub. Onun Rusiya ilə əlaqəsi və yaxınlığından görünürdü ki, o, anti-türk mövqedədir. Ortaya çıxan sübutlardan sonra Ramiz Mehdiyev və onun digər qolları istintaqa cəlb edilməli, həbs olunmalıdır. Hələ ki, 5-6 nəfərin adı hallanır, amma məsələ bununla yekunlaşmır. Onun ciddi iqtidar qolu var və hər biri ifşa edilməli, cəzası verilməlidir”.