Təbriz Gənclər İttifaqı İranda son proseslər və Güneydə müşahidə olunan siyasi fəallıqla bağlı açıqlama yayıb.
Crossmedia.az bu barədə xarici mediaya istinadən xəbər verir.
Açıqlamada qeyd olunub ki, bu dəfə Pəhləvinin əvvəlki dövrlərlə müqayisədə İran daxilində real təsir yaratdığı müşahidə olunur.
Bildirilib ki, indiyədək proseslərə ciddi təsir göstərə bilməyən Pəhləvi son hadisələr fonunda tərəfdarlarını səfərbər etməyə nail olub. Bununla belə, İttifaq bu tendensiyanı narahatedici hesab edir. Qeyd olunur ki, son günlər Güney Azərbaycanda Pəhləvilərə bağlı şəbəkələrin təbliğatı xeyli artıb və xüsusilə gənclər arasında “təki mollalar getsin, Pəhləvi gəlsə də olar” düşüncəsi yayılmaqdadır.
Təbriz Gənclər İttifaqı vurğulayıb ki, bir pis rejimin daha pisi ilə əvəz olunması tarixən faciələrə səbəb olub. Açıqlamada bildirilib ki, mollalar dövründə din faktoru üzərindən olsa da, qeyri-fars xalqlar müəyyən dərəcədə sistemə inteqrasiya oluna biliblər, lakin Pəhləvi panfarsist ideologiyanı təmsil edir və bu, qeyri-fars xalqlar üçün ciddi təhlükə yaradır.
Eyni zamanda qeyd edilib ki, son günlər Güneydə Pəhləvilərə dəstək aksiyalarına qoşulan gənclərin sayı artmaqdadır. İttifaqın fikrincə, Güneydə insanlar rejimin dəyişməsini hər şeydən çox istəyir və Pəhləvilər bu alternativsizlikdən istifadə edirlər.
Açıqlamada, həmçinin İran hakimiyyətinin Pezeşkian kimi sistemə yaxın fiqurları önə çıxararaq cəmiyyəti öz tərəfində saxlamağa çalışdığı bildirilib. Təbriz Gənclər İttifaqı vurğulayıb ki, həm mövcud rejim, həm də Pəhləvi xətti təhlükəlidir və Güney Azərbaycan xalqı öz müqəddəratını həll etməyə hazır olmalıdır.
