Seçdiyiniz ölkədəki universiteti mütləq araşdırmalısınız
Xaricdə təhsil almağı planlaşdırarkən bir sıra məsələləri diqqətlə nəzərdən keçirmək və ətraflı araşdırma aparmaq vacibdir. Bəs xaricdə təhsil almaq üçün hansı məqamları xüsusilə nəzərə almaq lazımdır?
Mövzu ilə bağlı təhsil eksperti Rizvan Fikrətoğlu Crossmedia.az-a açıqlamasında bildirib ki, sosial platformalarda, xəbər saytlarında, radio və televiziya kanallarında xaricdə təhsil elanları çoxalıb:
"Biznes baxımından bu sahədə gəlirin çox olması, tabesizlik, nəzarətsizlik bu istiqamətdə işbazlara da xeyli yollar açıb. Bütün bunlar qanunlara müvafiq şəkildə işləyən və uzun illərdir ki, təcrübəsi olan xaricdə təhsil şirkətlərinə də xələl gətirir, inamı azaldır.
Əksəriyyəti mövsümi olan bu şəxslər hansısa xaricdə təhsil şirkəti adı altında, əsasən də qəbul imtahanlarından sonra daha çox müsabiqə şərtini ödəməmiş abituriyentlərə və onların yaxınlarını tora salmağa əsl fürsət tapırlar. Oğlan uşaqlarının əsgərliyə getmə qorxusu olan valideynləri tora salmaq daha asan olur. Elm və Təhsil Nazirliyi təhsil verən müəssisə olmadıqları üçün heç bir xaricdə təhsil şirkəti ilə əməkdaşlıq etmir. Belə şirkətlər əsasən xarici ali təhsil müəssisələrinə qəbul üçün sənədləşmə, danışıqlar və tələbələrin qalması üçün əlaqələndirmə kimi işləri yerinə yetirirlər.
Əslində abituriyenlər, valideynlər özləri də birbaşa olaraq xarici ali təhsil müəssisələrindən qəbul proseduralarını sorğu edərək aidiyyəti üzrə müraciət edə bilərlər. Bunu edə bilmədikləri üçün xaricdə təhsil şirkətlərindən kömək alırlar. Lakin hər xaricdə təhsil şirkətindən kömək almaq düzgün deyil. Bunun üçün diqqət yetirməli bəzi məqamlar var. Düzgün işləyən təhsil şirkətinin üstünlüyü odur ki, sizə bələdçilik edir, birbaşa konsultasiya aparır, bilik və bacarıqlarınıza uyğun ixtisasa yönləndirir, vaxtında müraciət edilməsini, sənədlərin düzgün toplanılmasını və digər prosedur qaydalarını izah edir və toplamaqda yardım göstərir. Xaricdə təhsil şirkəti ilə müqavilə bağlayarkən bəndlərə fikir vermək lazımdır. Onların öhdəliyini diqqətlə analiz edin".
Ekspertin sözlərinə görə, seçdiyiniz ölkədəki universiteti mütləq araşdırmalısınız:
"Təhsilin keyfiyyətindən tutmuş universitetin prestijli olub-olmamasına, diplomlarının Azərbaycanda tanınıb-tanınmamasına qədər diqqət etməlisiniz. Seçəcəyiniz universitetin akreditasiyasına, təhsil formasına, ixtisasın uyğunluğuna diqqətlə nəzər yetirin. Elm və Təhsil Nazirliyi yanında Təhsildə Təminat və Keyfiyyət Agentliyi mütəmadi olaraq, Azərbaycanda tanınmama faizi çox olar universitetlərin siyasını yeniləyir, həmin siyahıya da nəzər sala bilərsiniz".
Elnurə Kərimova
14:40 29.11.2024
Oxunuş sayı: 9211
