Ölkə başçısının Azərbaycan təhsilinin inkişafı qarşısında çox böyük xidmətləri vardır - Deputat
Müasir dövrdə dövlətlərin dayanıqlı inkişafı, rəqabətqabiliyyətli iqtisadiyyatın formalaşdırılması və milli potensialın gücləndirilməsi birbaşa insan kapitalının keyfiyyəti ilə ölçülür. Bu baxımdan təhsil sahəsi hər bir ölkənin strateji prioritetləri sırasında xüsusi yer tutur. Azərbaycanda təhsilin inkişafı, onun müasir çağırışlara uyğunlaşdırılması və beynəlxalq standartlar səviyyəsinə yüksəldilməsi məhz ölkə başçısının uzaqgörən siyasətinin əsas istiqamətlərindən biridir.
Son illər Prezidentin rəhbərliyi ilə həyata keçirilən məqsədyönlü islahatlar nəticəsində təhsilin bütün pillələrində infrastrukturun yenilənməsi, müəllim nüfuzunun artırılması, rəqəmsal təhsil mühitinin formalaşdırılması və gənclərin bilik və bacarıqlarının inkişafına xidmət edən ardıcıl addımlar atılıb. Bu siyasət yalnız bu günün deyil, eyni zamanda Azərbaycanın gələcək inkişafının möhkəm təməlini təşkil edir.
Ölkə başçısının təhsil sahəsinə verdiyi tövhələr və gördüyü işlərlə bağlı Milli Məclisin deputatı Ceyhun Məmmədov Crossmedia.az-la öz fikirlərini bölüşüb: "Cənab Prezident ölkənin bir çox sahələrində olduğu kimi, elm və təhsil sahəsinə də xüsusi diqqət və qayğı göstərir. Heç şübhəsiz ki, cənab Prezidentin Azərbaycan təhsilinin inkişafı qarşısında çox böyük xidmətləri vardır. Son illər ölkəmizdə təhsilə ayrılan vəsaitlərin davamlı şəkildə artırılması, Qarabağ Universitetinin inşası bunun bariz nümunəsidir. Biz bu gün cənab Prezidentin Qarabağ Universitetində yeni tədris korpuslarının açılışında iştirak etdiyini, eyni zamanda yeni tikiləcək binaların təməlini qoyduğunu müşahidə etdik.
Bu gün cənab Prezidentin həyata keçirdiyi siyasətin əsas prioritetlərindən biri Qarabağın yenidən dirçəldilməsidir. Qarabağ Universiteti də bu siyasətin mühüm tərkib hissəsi olaraq sürətlə inkişaf edir və gələcəkdə daha böyük uğurlara imza atacağı gözlənilir. Xüsusilə qeyd etmək lazımdır ki, İtaliya-Azərbaycan Universiteti layihəsi də bu istiqamətdə atılan mühüm addımlardandır. İllər öncə cənab Prezidentin təşəbbüsü ilə yaradılan ADA Universiteti bu gün Azərbaycan təhsilinə davamlı və mühüm töhfələr verməkdədir".
Deputat həmçinin Prezidentin təhsil sahəsində həyata keçirdiyi islahatlardan birinində Azərbaycan gənclərinin xaricdə təhsil almasına geniş imkanların yaradılması olduğunu bildirib: "Bu proses bu gün də uğurla davam etdirilir. Tələbə Kredit Fondunun yaradılması, Təhsilin İnkişafı Fondunun fəaliyyəti, Elm və Təhsil Nazirliyinin strukturunda bir sıra yeni qurumların təsis edilməsi, işğaldan azad olunmuş ərazilərdə müasir tələblərə cavab verən məktəblərin inşa olunması bu siyasətin tərkib hissəsidir. Eyni zamanda, Azərbaycan-Türkiyə təhsil əməkdaşlığının genişləndirilməsi, Bakı Ali Neft Məktəbinin yaradılması və imkanlarının artırılması da xüsusi əhəmiyyət daşıyır.
Bütün bunlar cənab Prezidentin təhsil sahəsinə göstərdiyi diqqət və qayğının bariz göstəricisidir. Təhsil siyasətinin əsas məqsədi gənclərin bilik və bacarıqlarının artırılması, onların müasir tələblərə cavab verən mütəxəssis kimi formalaşdırılmasıdır. Bu yaxınlarda cənab Prezident sənaye və peşə təhsili ilə bağlı mühüm bir sənəd imzalamışdır. Həmin sənədə əsasən yeni peşə məktəblərinin inşası, iki peşə məktəbinin isə yenidən qurulması nəzərdə tutulur.
Ümumilikdə, bölgələrimizdə yüzlərlə yeni məktəb inşa olunmuş, yüzlərlə təhsil müəssisəsi əsaslı şəkildə təmir və yenidənqurma işləri ilə təmin edilmişdir".
13:37 24.12.2025
Oxunuş sayı: 3770
