Son prezident seçkiləri də göstərdi ki, xalq birmənalı şəkildə İlham Əliyevə etimad göstərir - Komitə sədri
Azərbaycan Respublikasının Prezidenti, Ali Baş Komandan İlham Əliyev Xankəndiyə səfər edib. Dövlət başçısı səfər çərçivəsində Qarabağda aparılan genişmiqyaslı quruculuq və bərpa işləri ilə tanış olub, strateji əhəmiyyət daşıyan obyektlərdə görülən tikinti işlərinin gedişatını izləyib. Prezidentin Xankəndiyə səfəri Azərbaycanın ərazi bütövlüyünün tam bərpasının və Qarabağın yeni inkişaf mərhələsinə qədəm qoymasının rəmzi göstəricisi kimi dəyərləndirilir.
Prezidentin səfəri ilə bağlı Milli Məclisin Elm və təhsil komitəsinin sədri Anar İsgəndərov Crossmedia.az-a açıqlama verib. O qeyd edib ki, 1828-ci il Türkmənçay müqaviləsi Azərbaycan, o cümlədən Qarabağ xanlığı üçün faciələr yaratdı: ‘’Əslində isə 1826-cı ildə Qarabağ xanlığının fəaliyyətinə son qoyulmuşdu. 1828-ci il müqaviləsi Şimali Azərbaycan xanlıqlarının, o cümlədən İrəvan və Naxçıvan xanlıqlarının Rusiya tərəfindən işğalını rəsmiləşdirdi və bu müqavilədən bir qədər sonra İrəvan və Naxçıvan xanlıqları ərazisində Erməni vilayəti yaradıldı. Təbii ki, xanlıqlar ərazisinə yerləşdirilən erməni əhalisi Azərbaycanın tarixi üçün sonrakı mərhələlərdə ciddi fəlakətlərə səbəb oldu. 1918-ci illərdə Qarabağ Azərbaycanın tarixi torpağı kimi onun tərkibində qalsa da, ermənilər hər vəchlə Zəngəzuru və Qarabağı Azərbaycandan ayıraraq Ermənistana birləşdirməyə çalışırdılar. 1920-ci ilin aprelində bu istiqamətdə ermənilər üçün fürsət yarandı. Azərbaycan Xalq Cümhuriyyətinin fəaliyyətinə son qoyuldu, XI Qızıl Ordu Azərbaycanı işğal etdi və nəticədə Qərbi Zəngəzur Ermənistanda qaldı. 1921-ci ilin 14 iyulunda Qarabağın Ermənistana verilməsi məsələsi gündəmə gəlsə də, bir gün sonra onun Azərbaycanın tərkibində muxtar qurum kimi saxlanılması məsləhət görüldü. Əslində, bütün bu proseslər Sovet Rusiyası tərəfindən idarə olunurdu. 1923-cü ildə Dağlıq Qarabağ Muxtar Vilayətinin yaradılması ilə Qarabağ formal olaraq Azərbaycan torpağı sayılsa da, Xankəndinə getmək, orada işləmək və fəaliyyət göstərmək sovet dövründə belə ciddi problemlərlə müşayiət olunurdu. SSRİ-nin dağılmasından sonra isə ermənilər bu torpaqları açıq şəkildə mənimsəməyə çalışdılar, min illər boyu burada yaşamış azərbaycanlıları doğma yurdlarından qovdular və onlara qarşı soyqırımı siyasəti apardılar’’.
Deputat bildirib ki, 44 günlük Vətən müharibəsi ilə Azərbaycan öz tarixi torpaqlarını geri qaytardı: ‘’Şərqi Zəngəzur da, Qarabağ da azad edildi, erməni separatizminə birdəfəlik son qoyuldu və Azərbaycan bayrağı ölkəmizin bütün ərazilərində, o cümlədən Xankəndində qürurla dalğalanmağa başladı. Prezidentin növbəti dəfə Xankəndinə səfəri, eləcə də bu şəhərə ən yaxın və uzun illər mübarizə meydanı olmuş Kərkicahan qəsəbəsində əhali ilə görüşü xüsusi əhəmiyyət daşıyır. Bir zamanlar adını çəkmək belə bizdə həyəcan və ağrı yaradan Xankəndi artıq azad torpağımızdır. Vaxtilə bu mümkünsüz görünürdü, çünki düşmənin havadarları güclü idi, özü isə hər cür silahla təchiz olunmuşdu. Amma Azərbaycan xalqı Ulu Öndər Heydər Əliyevin dediyi kimi, heç vaxt Qarabağdan əl çəkmədi. 2003-cü ildən sonra bu mübarizəni Prezident İlham Əliyev öz üzərinə götürdü. Xalq onun ətrafında “dəmir yumruq” kimi birləşdi. 44 günlük Vətən müharibəsi və 2023-cü ilin sentyabrında keçirilən antiterror əməliyyatı nəticəsində Qarabağ, o cümlədən Xankəndi çoxillik işğaldan azad edildi. Dövlət başçısının Qarabağa mütəmadi səfərləri, təməlqoyma mərasimlərində iştirakı, məktəblərin, bağçaların və dövlət binalarının açılışı onu göstərir ki, Qarabağ sözün əsl mənasında cənnətə çevrilir. Qarabağın fatehi olan Ali Baş Komandan bu missiyanı uğurla həyata keçirir’’.
A.İsgəndərov vurğulayıb ki, onun qətiyyəti və cəsarəti bütün dünyaya bir daha sübut etdi ki, Azərbaycan dövlət başçısı nümunəvi liderlərdən biridir: ‘’Xalq onu sevir və dəstəkləyir. Son prezident seçkiləri də göstərdi ki, xalq birmənalı şəkildə İlham Əliyevə etimad göstərir. Prezidentin ad günü ərəfəsində Xankəndində, Qarabağda olması və görülən quruculuq-bərpa işlərini şəxsən izləməsi bir daha təsdiqləyir ki, Qarabağ mütləq cənnətə çevriləcək. Qarabağın sahibi də, xilaskarı da bəllidir. Biz də fürsətdən istifadə edərək Azərbaycan Respublikasının Prezidentini ad günü münasibətilə təbrik edir, xalqın daim dövlət başçısının yanında olduğunu vurğulayırıq’’.
Sevinc Yarməmmədova
09:39 24.12.2025
Oxunuş sayı: 5683
