Gündəm
Hikmət Hacıyev: Qəzza üzrə beynəlxalq missiyada iştirak sual altındadır
Azərbaycan Prezidentinin köməkçisi – Prezident Administrasiyasının xarici siyasət məsələləri şöbəsinin müdiri Hikmət Hacıyev Azərbaycanın Qəzzada yerləşdirilməsi planlaşdırılan beynəlxalq qüvvələrə qoşulması ilə bağlı şübhələrini ifadə edib.
Bu barədə Crossmedia.az Böyük Britaniyanın Middle East Eye (MEE) portalının yaydığı məlumata istinadən xəbər verir.
Hacıyev bildirib ki, ABŞ-nin vasitəçiliyi ilə hazırlanmış atəşkəs planı çərçivəsində yaradılacaq qüvvələrdə Bakının iştirakı mandatın çərçivəsi ilə bağlı suallar səbəbindən çətin görünür.
Yaponiyanın Nikkei qəzetinə verdiyi müsahibədə isə o, Vaşinqtonun Azərbaycan tərəfinə beynəlxalq sabitləşdirmə qüvvələrinə qoşulmaq təklifi ilə müraciət etdiyini qeyd edib:
“Son qərar hələ qəbul edilməyib”, – deyə Hikmət Hacıyev vurğulayıb.
BMT Təhlükəsizlik Şurası bu qüvvələrin yaradılması ilə bağlı qətnaməni təsdiqləyib və sənəd Türkiyə, Qətər, Misir, BƏƏ, Səudiyyə Ərəbistanı, İndoneziya, Pakistan və İordaniya tərəfindən rəsmi şəkildə dəstəklənib. Lakin bundan sonra prosesdə ciddi irəliləyiş müşahidə olunmayıb.
Hikmət Hacıyev narahatlığını ifadə edərək bildirib ki, Təhlükəsizlik Şurasının qətnaməsində “Qəzzada konkret döyüş qaydaları, əməliyyatların icra mexanizmi və missiyanın mandat çərçivəsi ilə bağlı məsələlər əksini tapmayıb”.
O, həmçinin qeyd edib ki, Azərbaycan 2023-cü ilə qədər qonşu Ermənistanla müharibə şəraitində olub və cəmiyyətin əlavə hərbi kontingentin səfərbər edilməsinə razı salınması asan olmayacaq.
Məlumata görə, yaradılacaq qüvvələr Qəzzada təhlükəsizliyin təmin edilməsi, ərazinin demilitarizasiyası və Fələstin polis qüvvələrinin hazırlanması ilə məşğul olacaq.
Mehriban İbrahimli
15:48 23.12.2025
Oxunuş sayı: 5150
