Fazil Mustafa: Söhbət ermənilərə güvənməkdən getmir
Regionda iqtisadi və nəqliyyat əlaqələrinin bərpası istiqamətində atılan addımlar artıq konkret nəticələr verməyə başlayıb. Bu proses çərçivəsində Azərbaycan ilə Ermənistan arasında yüklərin tranziti sahəsində yeni mərhələ açılıb və uzun illərdən sonra enerji daşıyıcılarının daşınması həyata keçirilib.
Belə ki, Prezident İlham Əliyevin müvafiq qərarından sonra məhdudiyyətlərin aradan qaldırılması fonunda Azərbaycandan Ermənistana neft məhsullarının ixracına başlanılıb.
Bu barədə Crossmedia.az-a danışan Milli Məclisin deputatı Fazil Mustafa bildirib ki, normal yanaşma vacibdir: "Bu, iqtisadi münasibətlərin tədricən bərpa olunması deməkdir. Sülh sazişindən sonra diplomatik münasibətlər də bərpa olunacaq. "Əbədi düşmənçilik" anlayışı yoxdur. Söhbət ermənilərə güvənməkdən getmir. Təbii ki, erməni xislətini diqqətdə saxlamalıyıq, amma artıq biz bir dövlətik və məsələyə dövlət dəyərləri üzərindən yanaşmalıyıq. Dövlətimizin sülh şəraitində yaşaması üçün qalib dövlət kimi daha çox səy göstərməliyik. Problemimizi həll etmişiksə, gələcəkdə hansısa irinin qalmasına maraqlı olmamalıyıq. Bu baxımdan qaragüruhçuluğa qarşı mövqeyim açıqdır".
Deputat əlavə edib ki, cəmiyyət daxilində belə məsələlərə də dövlət prizmasından yanaşmaq lazımdır: "Bir müğənniyə qarşı linç kampaniyasını da bu kontekstdə qiymətləndirmək lazımdır. Hər kəs öz sahəsində addımlarını atmalıdır ki, qalib dövlət kimi qələbənin nəticələrini yekun səviyyəyə gətirə bilək. Özümüzdən asılı olan problemləri həll etməliyik və indi həm də Ermənistan cəmiyyətini bu məsələyə alışdırmalıyıq. Bu, 200 ildir yanlış məlumatlarla formalaşmış xəstə bir cəmiyyətdir. İndi biz bunu addım-addım dəyişməliyik. Onlar qonşuluqdan qaçan deyillər və biz də qonşuluqdan uzaqlaşan deyilik. Qonşuda sülh olması və digər ölkələrin bundan sui-istifadə etməməsi üçün indiki fürsətləri ağılla dəyərləndirməliyik".
Mehriban Yariyeva
14:20 20.12.2025
Oxunuş sayı: 1394
