Gündəm

Ankarada Prezident İlham Əliyevin rəhbərliyi ilə Azərbaycanın əldə etdiyi uğurlardan bəhs edən kitabların təqdimatı keçirilib

Ankara Universitetində Azərbaycan Prezidenti, Silahlı Qüvvələrin Ali Baş Komandanı İlham Əliyevin siyasətinə həsr olunmuş iki kitabın təqdimat mərasimi olub.

Crossmedia.az xəbər verir ki, ölkəmizin Ankaradakı səfirliyi, Türkiyə–Azərbaycan Dostluq, Əməkdaşlıq və Həmrəylik Fondu (TADİV) və Ankara Universitetinin rektorluğu tədbirə təşkilati dəstək göstərib.

Azərbaycanın “Modern İnkişaf və Ailə” İctimai Birliyinin sədri Zərifə Quliyevanın “Xariqələr Yaradan Qətiyyətli Lider” və Aygül Bağırovanın “Qalib sərkərdənin Böyük Qayıdışı” adlı kitablarının təqdimatında Türkiyə parlamentinin və Xarici İşlər Nazirliyinin nümayəndələri, azərbaycanlı diplomatlar, alimlər, tələbələr, eləcə də hər iki qardaş ölkənin ictimaiyyət nümayəndələri iştirak ediblər.

TADİV-in sədri, professor Aygün Attar çıxış edərək Azərbaycan reallıqlarının təbliğinin əhəmiyyətini vurğulayıb, gəncləri türk dövlətlərinin döyüş və qəhrəmanlıq tarixini unutmamağa çağırıb.

Türkiyə–Azərbaycan parlamentlərarası dostluq qrupunun rəhbəri Şamil Ayrım çıxışında müasir Azərbaycanın inkişafının təməlini qoymuş Ulu Öndər Heydər Əliyevin siyasi kursunun əhəmiyyətindən danışıb. O, Prezident İlham Əliyevin Azərbaycan dövlətçiliyinin möhkəmləndirilməsi və inkişafına verdiyi xüsusi töhfəni qeyd edərək, Ali Baş Komandanın rəhbərliyi ilə Azərbaycanın ərazi bütövlüyü və suverenliyinin bərpa edilməsinin tarixi əhəmiyyət daşıdığını vurğulayıb.

Ş.Ayrım Türkiyə və Azərbaycanın gənc nəsillərinin prezidentlər Rəcəb Tayyib Ərdoğan və İlham Əliyevin əldə etdikləri nailiyyətləri qoruyub saxlayacağına və daha da inkişaf etdirəcəyinə əminliyini ifadə edib. O, həmçinin “Qalib sərkərdənin Böyük Qayıdışı” kitabının “Ön söz”ünün müəllifi olduğunu bildirib.

Azərbaycanın Ankaradakı səfirliyinin müşaviri Füzuli Məcidli təqdim olunan kitabları “Azərbaycanın müasir tarixinin işıqlandırıldığı mühüm əsərlər” kimi qiymətləndirib, Türkiyə–Azərbaycan dostluğunun sarsılmaz olduğunu vurğulayıb.

Milli Məclisin sabiq deputatı Həvva Məmmədova türk dövlətləri arasında birliyin vacibliyini qeyd edib. O, 44 günlük Vətən müharibəsi dövründə Türkiyənin göstərdiyi siyasi və mənəvi dəstəyin heç vaxt unudulmayacağını bildirərək, gənc nəslin bunu daim yadda saxlamasının zəruriliyini vurğulayıb.

“Modern İnkişaf və Ailə” İctimai Birliyinin sədri Zərifə Quliyeva Ankara Universitetinin tələbələrinə müraciət edərək Türkiyə və Azərbaycan vəhdətinin keşiyində durmağa çağırıb. Onun sözlərinə görə, hər yeni nəsil Prezident İlham Əliyevin uzaqgörən siyasəti və onun rəhbərliyi altında Vətənin bütövlüyünü bərpa etmiş Azərbaycan oğullarının qəhrəmanlığı barədə hərtərəfli məlumatlandırılmalıdır.

“Qalib sərkərdənin Böyük Qayıdışı” kitabının müəllifi Aygül Bağırova isə kitabının Türkiyədə təqdim olunmasını özü üçün böyük şərəf və qürur mənbəyi adlandırıb. O bildirib ki, kitabını Vətən müharibəsinin ilk günündən yazmağa başlayıb.

“Oxuculara qəhrəmanlıq mübarizəsinin hər günü barədə tam dolğun məlumat çatdırmağa çalışmışam. Əminəm ki, gələcəkdə oxucular bu kitabları öz ölkələri ilə qürur duyaraq vərəqləyəcəklər”, - deyə A.Bağırova tədbirin təşkilatçılarına minnətdarlığını ifadə edib.(AZƏRTAC)