Azərbaycan-Türkiyə İnvestisiya Forumunda müzakirə ediləcək mövzular açıqlanıb
"II Azərbaycan-Türkiyə İnvestisiya Forumunda müzakirə ediləcək məsələlər arasında regionlararası ticarət, kommunikasiya, nəqliyyat dəhlizləri yer alacaq. Xüsusən də Zəngəzur dəhlizinin açılışı yaxınlaşdıqca dünya üçün önəmi daha da artır. Dəhliz açılandan sonra isə Türkiyə və Azərbaycan iqtisadiyyatı üçün əhəmiyyətli rola malik olacaq".
Oxu.Az xəbər verir ki, bunu Türkiyə-Azərbaycan İş Adamları və Sənayeçiləri İctimai Birliyinin (TÜİB) İdarə Heyətinin üzvü Salih Tüfekçi II Azərbaycan-Türkiyə İnvestisiya Forumuna dair keçirilən mətbuat konfransında deyib.
O bildirib ki, forumda ikinci panel kənd təsərrüfatına həsr olunacaq:
"Xüsusən də Qarabağın münbit və bərəkətli torpaqlarının iqtisadiyyatı şaxələndirmək üçün malik olduğu əhəmiyyəti paneldə müzakirə ediləcək".
"Bununla yanaşı, yaşıl iqtisadiyyata keçid və Azərbaycanın COP29-dan sonra bu istiqamətdə atdığı uğurlu addımlar forumun əsas mövzularından olacaq. Nəzərə alsaq ki, SOCAR vasitəsilə Azərbaycan Türkiyənin əsas investoruna çevrilib, bu da iki ölkə üçün mühüm əhəmiyyətə malikdir", - deyə nümayəndə əlavə edib.
11:50 10.12.2025
Oxunuş sayı: 1497
