Yermak istefa verdi: Qərb ölkələrinin narazılığı aylarla artmaqda idi
Ukrayna Prezident Administrasiyasının rəhbəri Andriy Yermak, xarici tərəfdaşlar arasında uzun müddətdir davam edən narazılıqların fonunda və artan tənqidlərdən sonra istefa verib.
Crossmedia.az The Telegraph-a istinadən xəbər verir. Məlumata görə, ABŞ-də hər iki partiyanın rəsmiləri Yermakı qəfil qərarlar verən və proseslərə dağıdıcı təsir göstərən fiqur kimi qiymətləndirirdilər. Bir mənbə onu “hər iki tərəf üçün qıcıqlandırıcı” adlandırıb.
Xüsusilə Yermakın sabiq prezident Donald Trampla Oval Ofisdə baş tutan və Kiyev üçün mənfi nəticələr doğuran görüşün təşkilindəki rolu Vaşinqtonun narazılığını daha da artırıb. Həmin görüşdə ukraynalı məhbusların ağır vəziyyətini əks etdirən görüntülərin Trampa göstərilməsi ABŞ-dəki mövqelərə ciddi zərbə kimi dəyərləndirilib.
ABŞ rəsmilərinin sözlərinə görə, görüşdən sonra Tramp administrasiyası Zelenskiyə Yermakı vəzifədən kənarlaşdırmağı tövsiyə edib. Bu çağırış həm diplomatik səhvlərlə, həm də Yermakın ingilis dili tərcüməçisindən asılı olması ilə əsaslandırılıb.
Avropalı müttəfiqlərin də Zelenskiyə təzyiq göstərdiyi bildirilir. Onlar Yermakın artan təsir gücünün, sərt üslubunun və müxtəlif qalmaqallarla əlaqələrinin kritik bir mərhələdə Ukrayna rəhbərliyi daxilində birliyə və məsuliyyətə təhlükə yaratdığını düşünürdülər.
Nəticədə, xarici diplomatlar Yermakı Qərbin dəstəyinə zərər vuran, siyasi baxımdan “zəhərli” bir fiqur kimi qiymətləndirirdilər.
21:20 29.11.2025
Oxunuş sayı: 1055
