Uraloğlu: Qara dənizdə VİRAT tankerinə hücumun detalları açıqlanıb
Türkiyənin nəqliyyat və infrastruktur naziri Abdulkadir Uraloğlu bildirib ki, Qara dənizdə VİRAT tankerinə şənbə günü edilən dron hücumu nəticəsində gəmidə kiçik zədələr yaranıb, lakin vəziyyət sabitdir.
Crossmedia.az xarici KİV-ə istinadən xəbər verir. Nazir qeyd edib ki, Novorossiysk limanına istiqamətlənən iki tankerdən biri əvvəlki gün sahil yaxınlığında partlayışdan sonra alovlanan gəmi olub və ertəsi gün yenidən dron hücumuna məruz qalıb.
Uraloğlunun sözlərinə görə, VİRAT tankerinin sağ bort hissəsində yüngül zədələr müşahidə olunub və heyət üzvləri xəsarət almayıb. O əlavə edib ki, gəmiyə alov düşməyib: “Kapitan telefonla bizə müraciət edərək pilotsuz aparat hücumu baş verdiyini bildirdi. Sahil mühafizəsinin katerləri dərhal əraziyə göndərildi”.
Nazir həmçinin ötən gün hücuma məruz qalan “Kairos” tankerində daxili bölmələrdə yanğınsöndürmə işlərinin davam etdiyini, xarici hissədəki alovun artıq söndürüldüyünü bildirib. Onun sözlərinə görə, yanğın tam söndürüldükdən sonra hər iki gəmi böyük ehtimalla ən yaxın limana yedəklənəcək.
21:10 29.11.2025
Oxunuş sayı: 971
