Ankarada Aytmatov və Abayın ortaq türk əlifbası ilə nəşr olunan əsərlərinin təqdimatı keçirilib
Noyabrın 19-da Ankarada Beynəlxalq Türk Mədəniyyəti Təşkilatı (TÜRKSOY) və Türk Akademiyası tərəfindən ortaq türk əlifbası ilə nəşr olunmuş iki kitabın - Abay Kunanbayevin “Qara sözlər” və Çingiz Aytmatovun “Cəmilə” əsərlərinin təqdimat mərasimi keçirilib.
Crossmedia.az xəbər verir ki, tədbirdə müxtəlif türk dövlətlərindən diplomatlar, beynəlxalq təşkilatların əməkdaşları, alimlər, mütəxəssislər və ictimaiyyət nümayəndələri iştirak ediblər.
TÜRKSOY-un Baş katibi Sultan Raev iştirakçılara müraciətində kitabların təqdimatını Türk dünyası üçün ortaq gələcək konsepsiyasının reallaşdırılması istiqamətində mühüm addım adlandırıb.
O, rəhbərlik etdiyi təşkilatın türk dövlətləri arasında əlaqələrin möhkəmləndirilməsinə verdiyi töhfədən məmnunluğunu ifadə edib. Baş katibin sözlərinə görə, gənclərin türk xalqlarının mədəni irsini hərtərəfli öyrənməsi çox vacibdir.
Türk Akademiyasının prezidenti Şahin Mustafayev, öz növbəsində, 34 hərfdən ibarət ortaq türk əlifbasının qəbul edilməsinin əhəmiyyətini vurğulayıb. O qeyd edib ki, türk dövlətlərindən olan siyasətçilər və alimlər illərdir türk xalqlarını bir-birinə daha da yaxınlaşdıran tədbirlərin həyata keçirilməsi istiqamətində mühüm bir addım olaraq ortaq, türk əlifbası üzərində razılığa gəlməyin zəruriliyini dəfələrlə vurğulayıblar.
Şahin Mustafayev Abay Kunanbayevin və Çingiz Aytmatovun türk ədəbiyyatına böyük töhfələrini vurğulayıb və ortaq türk əlifbasında kitabların nəşrinin davam etdiriləcəyinə ümidvar olduğunu bildirib.
Sonra TÜRKSOY-un fəaliyyəti haqqında film nümayiş etdirilib.
İştirakçılara Beynəlxalq Türk Mədəniyyəti Təşkilatının digər nəşrləri də təqdim edilib.
Kitab təqdimatı panel müzakirələri ilə davam edib. (azərtac)
14:33 19.11.2025
Oxunuş sayı: 1134
