Türk millətinin şanlı irsi – 30 Avqust Zəfər Bayramı
Türkiyə Respublikasının müasir tarixində qızıl hərflərlə yazılmış ən önəmli günlərdən biri – 30 Avqust Zəfər Bayramı türk xalqının azadlıq uğrunda göstərdiyi misilsiz iradənin, əzmin və vətən sevgisinin parlaq təcəssümüdür. Bu gün 1922-ci ildə Böyük Taarruzla qazanılmış tarixi qələbəni, istiqlal uğrunda canından keçən qəhrəmanların şücaətini, mübarizə əzmini və milli həmrəyliyi əks etdirən əziz bir gündür.
Türk xalqı əsrlər boyunca azadlığı və müstəqilliyi naminə saysız-hesabsız mübarizələr aparmışdır. Lakin 30 Avqust 1922-ci il – Qurtuluş müharibəsinin qələbə ilə başa çatdığı, Türk Ordusunun əzmi və Mustafa Kamal Atatürkün müdrik rəhbərliyi ilə millətin tarixi tale yazısını dəyişdirdiyi gün kimi yaddaşlara həkk olunmuşdur. Bu zəfər yalnız bir hərbi uğur deyildi; o, millətin ruhunu dirçəldən, Türk dövlətçiliyinin əsaslarını möhkəmləndirən böyük bir dönüm nöqtəsi idi.
Zəfər Bayramı həm də türk gəncliyinə və gələcək nəsillərə əzmlə, imanla, vətən sevgisi ilə nələrin əldə edilə biləcəyini sübut edən ölməz bir dərsdir. Bu tarixi gün, qardaş Türkiyə xalqının gücünü, dövlətinə və müstəqilliyinə olan sarsılmaz bağlılığını nümayiş etdirir.
Bu gün Türkiyə xalqı həmin şanlı zəfərin ildönümünü qürurla qeyd edir, vətən uğrunda canından keçən qəhrəman şəhidlərin müqəddəs xatirəsini ehtiramla yad edir. Azərbaycan xalqı da qardaş Türkiyənin sevincinə ortaq olaraq, bu əlamətdar bayram münasibətilə dost və qardaş ölkəyə rifah, sülh, tərəqqi və əbədi müstəqillik arzulayır.
Yaşasın qardaş Türkiyə! Yaşasın Türk ordusu! Yaşasın 30 Avqust Zəfər Bayramı!
Elmir Heydərli
11:49 30.08.2025
Oxunuş sayı: 2989
