ABŞ: Türkiyə S-400-dən imtina etmədən F-35 proqramına qayıda bilməz
ABŞ Dövlət Departamenti təsdiqləyib ki, Türkiyə yalnız Rusiyadan aldığı S-400 hava hücumundan müdafiə sistemindən imtina etdiyi halda F-35 qırıcı təyyarələri proqramına geri qayıda bilər.
Crossmedia.az xarici KİV-ə istinadən xəbər verir ki, bu barədə qurumun Konqres üzvlərinə göndərdiyi məktubda bildirilir.
Məktubda qeyd olunub ki, ABŞ-nin mövqeyi dəyişməyib və Türkiyənin S-400 sisteminə sahib olması F-35 proqramında iştirakla uyğun gəlmir.
Həmçinin, sənədə ABŞ Dövlət Departamentinin qanunvericilik məsələləri üzrə yüksək vəzifəli rəsmisi Pol D. Gualyanone imza atıb. Belə ki, o, Türkiyəyə qoyulan şərtlərin Amerika qanunvericiliyində, xüsusən də 2020-ci il Müdafiə Büdcəsi Qanununun 1245-ci maddəsində açıq şəkildə göstərildiyini vurğulayıb.
Qeyd olunub ki, Tramp administrasiyası ABŞ-nin müdafiə və kəşfiyyat aktivlərinin qorunmasına, həmçinin “Amerikanın düşmənlərinə qarşı sanksiyalar vasitəsilə mübarizə haqqında qanun”a (CAATSA) əməl etməyə tam sadiqdir.
Xatırladaq ki, CAATSA qanunu çərçivəsində Türkiyə 2019-cu ildə S-400 sistemini alandan sonra sanksiyalara məruz qalıb.
Fatimə Məmmədova
18:09 21.08.2025
Oxunuş sayı: 6265
